E mundo di musica a stop di draai dia 25 di juni 2009, ora e noticia di e morto di Michael Jackson a bira conoci. E artista su lugar sin precedente den e historia di musica, a keda consolida rapidamente momento cu miyones di fanatico rond mundo a yora su perdida. Despues di 10 aña di su fayecimento ta revela potretnan di e camber unda el a muri. E imagennan ta forma parti di e documental ‘Killing Michael Jackson’. E documental aki rond di e bida di e ‘King of Pop’, a revela testimonio di tres detective cu a drenta su camber dia 25 di juni 2009, fecha cu e cantante, compositor y bailarin a muri. E artista a fayece di intoxicacion agudo di ‘propofol’ y ‘benzodiazepine’ na su mansion na North Carolwood Drive den e vecindario Holmby Hills na Los Angeles.
Scott Smith, un detective di Los Angeles Police Department (LAPD) a bisa: “Loke tabata straño cu mi a haya mi mes ta keda mira cada biaha su cuero di cabes. Door cu ora e tabata sali den publico e tabata bisti peluca. Mirando su cuero di cabes, e parti ariba tabatin hopi cicatriz. Casi niun cabey na banda di su cabes, di loke e tabata mustra un poco diferente manera cu e ta sali den publico, cu su cabey gelos. Jackson a sufri di kemaduranan di segundo grado na 1984, ora cu su cabey a pega na candela mientras e tabata filmando e anuncio di Pepsi, cu hunto cu su rumannan el a firma un contract di 5 miyon dollar. E resultado di esaki tabata cu el a sufri perdida di cabey y despues a somete na un cirugia reconstructivo na su cuero di cabes. E detectivenan a describi tambe e obhetonan straño cu nan a haya den e camber di Michael Jackson, cu tabata inclui: popchi, hangua, un prikbord cu muchanan jong riba dje y un serie di ‘post-it notes’ hopi straño.
Dr. Conrad Murray, cu tabata emplea como su dokter personal pa un salario di $ 150,000 mensual, a bisa polisnan cu e tabata duna ‘propofol’ na e cantante, un droga poderoso cu generalmente ta aplica prome y durante di un cirugía den e hospitalnan, pa 60 anochi sigui te 22 di junio 2009, ora el a purba di kite fo’i dje. E dokter a ser condena despues pa homicidio involuntario pa dun’e medicamento anestesico sin ta cualifica pa haci esaki. Den oranan tempran di 25 di juni, e dokter a duna Jackson un serie di diferente sedante den un intento pa yude, sin embargo no tabatin e efecto desea. Segun Dr. Murray cu Jackson tabata cada biaha mas agita y bou presion, bisando cu e mester ta cla pa su ‘comeback’ faltando solamente algun siman, pa un serie di concierto na O2 Arena na London. El a bay laga e training na Los Angeles poco despues di mey anochi, e dia anterior di su morto segun e buki “83 Minutes: The Doctor, The Damage and the Shocking Death of Michael Jackson”.
Jackson tabata conoci pa pasa tempo cu mucha hombernan chikito, y e acusacionnan di abuso sexual a sali na cla na principio di añanan nobenta.
