E entrepreneur, Tarita Riley, di ecompania di construccion y diseño, Builtfix, tambe ta sintiendo e efecto cu e crisis di coronavirus ta causando, tanto den e aspecto profesional como familiar. Como compania ta reina e inseguridad, si aki algun luna no lo tin material mas na Aruba. Nan ta consciente di esaki y ta actualmente ‘rond af’ rapido e proyectonan pendiente, p’asina cumpli cu nan clientenan. E video di Tarita ta graba den un di e proyectonan cu el a entrega awe como parti di un remodelacion cu Builtfix ta realisando.
Con bo a sinti y ki bo a pensa ora a anuncia e prome caso di COVID-19 na Aruba?
Mi tabata wardand’e yega paso cu nos lo no scapa di esaki, pero ora el a wordo anuncia bo ta sinti algo den bo curason, pasobra bo sa cu el a yega Aruba. Bo no sa ki ta bay pasa y tur e inseguridad rond di esaki. Nos ta un isla turistico y nos sa cu nos ta bay haya un impacto directo cual ya nos ta experienciando na Aruba aworaki.
Ki bo ta sentimento di e situacion na Aruba actualmente?
Actualmente no tin hopi caso manera e otro paisnan, pero si nos no tuma precaucion lo tin hopi probabilidad cu e ta bay subi. P’esey mes ora bo wak tur e hendenan riba caya ainda unda nan no mester ta, e ta hopi preocupante! Realmente si ta gobierno of ta riba social media mester conscientisa e hendenan aki, pero di un of otro manera nan mester bira mas consciente y mas responsabel.
Con bo ta mantene bo mes positivo durante e crisis aki?
Mi sa cu den economia semper bo tin bo ‘ups and downs’ , nos ta den un down aworaki, cual no na Aruba so pero mundialmente. Sinembargo mi sa cu nos ta bay mehora, principalmente nos cu tin nos mesun business , mester uza nos creatividad, pa nos sali for di esaki positivamente. Ora nos sali for di e situacion aki kico nos ta bay haci, pasobra corda bon cu mester haci uzo di e desventahanan y pa comberti nan den ventahanan pa ora cu economia cuminsa draai atrobe. Pues nos como Team di Builtfix, ta bezig cu esaki pa ora cu nos sali for di e crisis aki, pa nos cuminsa ‘rebuild’ no solamente nos compania pero Aruba completo.
