E cantante, actriz, influencer y empresaria, Josemith Bermúdez, a fayece awe madruga na e edad di 41 aña na Caracas. Ademas di su trayectoria na Venezuela, tambe el a participa den e telenovelanan mexicano manera ‘Tormenta en el paraíso’ y ‘Hasta que el dinero nos separe’. E causa di e morto di Josemith Bermúdez ta cancer di ovario, cu a keda diagnostica na 2016. Su lucha contra e enfermedad a cuminsa desde cu el a keda diagnostica na final di 2016, pero tabata na mei 2017 cu el a dicidi pa bisa publicamente, cu e ta sufri di cancer di ovario a traves di un campaña. Cu e placa cu el a haya e por a paga su tratamento, door cu e tabata enfrenta e falta escasez di medicina na Venezuela. E mesun aña el a anuncia su prome victoria ora cu e tabata completamente cura di malesa, sin embargo na 2018 e cancer a bolbe. Un aña despues e tabata feliz cu su di dos triunfo, ora cu e testnan a sali cu e ta liber di cancer, pero su felicidad a dura poco.
E nachtmerrie di e acrtiz a cuminsa ora cu a descubri ‘metástasis’ na su bekken, kiermen cu e enfermedad a extende na otro parti di su curpa. “Nada ta eterno na mundo, ni video, ijscream, ni loke ta bunita ni loke ta mahos, pero mi ta bay ta den e curason di esunnan cu ta stima mi, te ora cu boso ta den otro curasonnan, asina nada ta muri, y tur cos semper ta sigui, ta bida ‘inexorable’”, Josemith Bermúdez a skirbi riba Twitter.
E actriz tin un yiu, Juan Cristóbal di 11 aña, cu ta biba na Mexico hunto cu su tata. E mes a pidi su ex pareha pa hiba su yiu, pasobra e tabatin miedo di muri dilanti di dje. E tabata lanta anochi y su yiu tabata lanta pareu cu ne. Su miedo mas grandi tabata, cu e muri su so cu ne na cas. Den un live riba Instagram dia 7 di juli, Josemith Bermúdez a bisa cu e ta feliz cu su yiu ta cerca dje atrobe. Sigur e ta un dolor hopi fuerte pa e yiu cu tabata band’i su mama den su ultimo momentonan na bida. Un amigo di e actriz, e periodista Luis Olavarrieta a duna e noticia tristo di e fayecimento den un comunicado di prensa riba Twitter.
