Aruba Tourism Authority (A.T.A.) como parti di e “Autentico Aruba Culinary Festival” a presenta un competencia culinario entre studiantenan di EPB y EPI na EPB Oranjestad. Un competencia cu a provee studiantenan e oportunidad pa traha di cerca cu chefnan profesional y pa experiencia e presion di un competencia culinario den bida real. Un total di seis studiante a wordo selecta pa asisti tres chef local durante e competencia di Iron Chef 2024, dia 13 di october na The Pavilion den Wilhelminastraat.
E huradonan di e competencia tabata Chef Juan Ludeña di Papilon Restaurant, Chef de Cuisine Jeanclaude Werleman di Infini Aruba y Sous Chef Moises Ramirez di Lima Bistro. Nan a fungi como hurado durante di e competencia entre studiantenan na EPB Hato. Esakinan ta e tres chefnan local cu porcierto lo ta esunnan competiendo durante di Iron Chef 2024.
Despues cu e studiantenan a presenta tres serie di cuminda, e momento final a yega pa scoge e seis studiantenan cu lo bay asisti durante di Iron Chef 2024. E ganadornan a keda den nomber di Micheal Padron, Kahlil Mullers, Shandon Helder, Jayden Heyden, Dylan Cardona y Annie Ortega. Nos ta ansioso pa mira nan asistencia riba e podium principal durante di “Autentico Aruba Culinary Festival”, un combinacion di studiante di EPB y EPI.
E invitacion ta keda na e comunidad di Aruba pa bin presencia The Pavilion den Wilhelminastraat dia 12 y 13 di october den e area historico di Wilhelminastraat den centro di Oranjestad. Bishitantenan di e festival lo bay gosa di Aruba su producto culinario cu ta uno diversifica. E festival ta un celebracion di e producto culinario varia di e isla, cu a ser crea y inspira pa entre otro chefnan local. Cu pasion pa gastronomia, e local como e bishitante di e isla lo tin e oportunidad pa descubri diferente restaurant y sabornan nobo durante e siman di evento.
Calendario:
Autentico Restaurant Week lo tuma luga entre 7 cu 11 di october. Durante e prome parti di e siman, diferente restaurant participante lo presenta menu special, descuento, of organisa nan propio evento culinario.
Dia 12 di october, lo percura pa un escena culinario diversifica durante di e The Pavilion den Wilhelminastraat. Riba e dia aki tambe lo por presencia e competencia di Bartender’s Brawl.
Dia 13 di october, lo percura pa un escena culinario varia durante di e The Pavilion den Wilhelminastraat. Alabes, lo bay presencia tres chefnan local cu lo bay competi den Iron Chef 2024 riba e podium principal. Caminda cu cada chef lo wordo asisti pa e studiantenan culinario di EPI y EPB, demostrando nan habilidad bou di presion.
Informacion di Ticket
Ticketnan ya ta disponibel riba www.autenticofestival.com. Por cumpra bo Weekend Pass na balor di AWG. 54, esaki lo inclui un credito di F&B na balor di AWG. 30. Of por cumpra e Day Pass na balor di AWG. 36, esaki lo inclui un credito di F&B na balor di AWG. 20. Cada ticket lo inclui un glas reusabel, credito di F&B, entrada na e Bartender Brawl dia 12 di october, y e competencia di Iron Chef 2024 dia 13 di october.
Credito no uza lo bay como donacion na un bon causa.
Sigui Autentico Aruba Culinary Festival riba Facebook, Instagram, y www.autenticofestival.com pa mas informacion.
 como parti di e “Autentico Aruba Culinary Festival” a presenta un competencia culinario entre studiantenan){kind=link}