Magic 96.5 FM ta sumamente entusiasma pa anuncia cu e stacion lo brinda cobertura intensivo y vibrante di e UEFA Women’s Euro 2025, cu lo tuma luga for di 2 te 27 di juli na Suisa. E campeonato ta su 14e edicion y ta un di e evento deportivo mas prestigioso den Europa pa seleccionnan femenino.
Pa ta na e altura di un torneo internacional di e magnitud aki, Magic a forma un ekipo solido di comentarista y analista local cu un pasion genuino pa futbol. Liderando e cobertura ta e tan stima Cadochi Kock, un narado keri y respeta riba e isla, acompaña pa e talentoso Devin de Veer y Arianne Westerburger, kende nan conocemento y estilo fresco ta trece un dinamismo nobo na e transmision.
Erin Croes, directora di Magic FM, ta expresa su orguyo: “Pa nos, e cobertura di UEFA Women’s Euro 2025 ta mas cu simplemente transmiti wega – nos ta duna visibilidad y plataforma na deporte femenino. Nos ta kere den poder di representacion y e inspiracion cu esaki por duna na atleta y fanatico, pero particularmente na nos mucha y hobennan.”
Magic FM ta mantene su fama como e stacion cu ta sinonimo cu profesionalismo tanto den aire como tecnico. Cualidad den audio, contenido relevante y atencion pa detaye ta loke Magic ta briya aden. E campeonato na Suisa ta un oportunidad mas pa trece deporte internacional cerca di pueblo Arubano, cu emocion, ritmo y respet pa e nivel cu e atletanan femenino lo pone riba e cancha.
Inglatera ta bini pa defende su titulo, pero 15 otro pais tambe ta bin lucha cu mesun deseo: sali campeon. Magic FM ta invita tur oyente pa sigui e torneo completo – for di partido di apertura te e gran final – cu cobertura, analisis y emocion den nos dushi idioma Papiamento y for di e comodidad di unda cu bo ta.
