E idea pa e prome workshop “Mirar con el Corazón” a surgi di un necesidad hopi personal di e fotografo Mayo Stoppels. E tin mas cu 14 aña captando e beyesa di loke ta real, pero a yega un momento pa reinventa su mes y bolbe haya sentido den fotografia. E tabata kier a uza e lens no solamente como un herment visual sino como un spiel di e alma. Mayo a cuminsa explora e relacion entre imagen, emocion y conocemento propio. El a descubri cu hopi hende tambe tabata anhela e reconexion aki. Asina “Mirar con el Corazón” a nace como un espacio pa tuma un pauze, sinti y mira e berdad.
Mayo na comienso den fotografia a tene cuatro exposicion artistico, explorando identidad y alma a traves di imagen. Despues bida a hib’e pa retrato, boda y fotografia comercial. Awendia e ta combina arte, fotografia y mindfulness como un forma di mira mas aleu di lo evidente, di conecta cu loke ta sensibel, autentico y presente. Pa Mayo e camera ta mucho mas cu un herment: e ta un spiel y un brug entre loke ta interno y visibel. Su mayor reto como fotografo ta pa laga perfeccion los. Stop di busca lo perfecto pa haya lo berdadero. Den fotografia – manera den bida – e mas poderoso no semper ta loke ta “bunita” sino loke ta sinti berdadero. E ta emocion, presencia y mira cu e alma. Como fotografo e ta kere cu arte nunca tabata perfeccion.
Den Focus Digital Magazine di juni, Mayo Stoppels ta conta kico tabata su enfoke na principio y con esaki a cambia durante añanan. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
