Durante e siman di e certamen di Miss Teen Mundial nos por a mira con Jennely Winklaar representando Aruba a sa di briya memey di e candidatanan cu su spontanidad y beyesa. Jennely ta competiendo awe nochi na El Salvador, cu ta sede di e certamen pa e titulo maximo. Henter su preparacion a bay sublime unda el a ricibi training extenso riba pasarela y tambe e parti di public speaking, entrevista, etiquette y protocol.
Jennely a luci pa su entrevista cu hurado un creacion cu ta simbolisa husticia pa su pueblo. Actualmente e ta den su estudio pa bira polis y el a opta pa bisti un trahe cu un significacion profundo. El a nace den un famia cu hopi hende homber ta polis, cu a forma su moral y a dun’e curashi pa sigui cu e legado cu nan ta orguyoso di dje. Segun Jennely cu como hende muhe ta spera cu ta fit den cierto stereotiponan cu ta minimalisa e capacidadnan y sociedad semper ta purba skirbi un narativo.
Sinembargo e no a permiti esaki ta un obstaculo den su caminda. Jennely Winklaar a sostene riba su dedicacion y perseverancia di tal manera cu awendia e ta orguyoso di bisa cu e ta parti di e proximo generacion di agente policial di Aruba. El a proba cu como hende muhe e ta parti di sernan cu potencial y forsa, cu ta mas grandi cu cualkier narativo cu por ser poni. “Nos ta capaz di skirbi nos propio historia y crea un realidad caminda nos bosnan ta resona den tur skina di mundo. No ta importa si e ta den un certamen of sirbiendo nos pais orguyosamente”.
E ta prome biaha den historia di Miss Teen Mundial cu un participante ta polis, cual a causa un impacto tanto den e organisacion como e miembronan di hurado. Durante e cena di despedida di Miss Teen Mundial 2024, Jennely a ricibi un grato sorpresa ora nan a canta Happy Birthday anticipando su cumpleaño dia 28 di juli cu e ta cumpli 19 aña di edad. Otro sorpresa cu a yena Jennely di hopi emocion tabata e yegada inespera di Robin Ponson, president di Miss Youth Aruba, pa apoya su candidata pa e anochi final. Hopi Exito awe pa Jennely Winklaar cu ta representando Aruba di gran forma den e certamen di Miss Teen Mundial by Francisco Cortez II na El Salvador.
E certamen ta inicia 10:00PM ora di Aruba.
Miss Teen Mundial by Francisco Cortez II: Facebook / Youtube
