Rosa Nurys Godet ta un empresario admira na nivel internacional, cu desde jong a destaca den labornan filantropico dedica na aporta atencion y cuido na humanidad. Licenciada Godet ta presidente di varios organisacion internacional, entre cual tin Fundacion Internacional Paraiso de las Rosas, cu ta enfoca den bienestar di e hendenan menos afortuna, specialmente mucha, adolescente y adulto mayor. E ta fundado di Alas del Mar, cu su proposito ta di sigura e descanso eterno na nan tera natal di turista- of bishitantenan cu a fayece na tera extranhero. Aliviando e dolor di e famianan y reconociendo tambe e paisnan cu ta uni pa reduci e cantidad di extranheronan cu ta ser dera na tera aheno.
Rosa Nurys Godet a nace na Republica Dominicana y for di chikito a demostra cu e tin compasion y amor pa otro persona. Tempo e tabatin 7 aña di edad, e tabata recoge e muchanan riba caya pa hiba nan su cas. E no tabata duna nan solamente cuminda, pero tambe baña y bisti nan paña limpi ademas di percura pa nan tin algo pa bay cas cu ne. Como mucha Rosa Nurys a pasa den varios intervencion kirugico door cu el a nace cu cleft palate y el a cuminsa papia te cu su shete aña. E ta corda cu sin por a papia, e tabata yuda e muchanan cu nan tareanan escolar, pasobra e kier a yuda y ser parti util di e humanidad.
Rosa Nurys a muda pa Sint Maarten unda desde hoben el a cuminsa traha y cu nacemento di su prome yiu Rocio, e mester a enfrenta bida como adulto. El a traha duro den salon di beyesa y modela pa diferente tienda pa sostene su yiu y su mama. Sinembargo un oportunidad a presenta cual a habri porta pa horizontenan nobo. Rosa Nurys a ricibi un beca pa studia na e prestigioso academia, Barbizon Modeling School, na New York. El a regresa Sint Maarten cu un vision mas amplio y empodera di e experiencia cu el a biba na e gran ciudad. Rosa Nurys a desaroya un empresa chikito di costura, salon di beyesa y boutique, cualnan a habri e porta pa e desaroyo no solamente personal sino fomenta desaroyo di e pais. Door di su ideanan el a logra implementa un acuerdo cu algun empresa pa e uzo di uniform, cual e tabata diseña y fabrica.
E tabata a traves di e empresa aki cu el a conoce su prome casa Ashok Ramchandani, un empresario Hindu cu tabata radica na Sint Maarten y nan a haya dos yiu: Shaheen y Ashok Jr. Na 2014 despues di fayecimento di e tata di su yiunan, el a bolbe Aruba. Desde e repentino regreso di Rosa Nurys y su yiunan na Aruba, cu e ta yama e isla di su destino, e ta dedica na yuda e comunidad. E ta brindando apoyo y orientacion na e hendenan cu ta riba caya manera e chollernan cu ta den optimo necesidad. El a hasta logra yuda algun pa integra bek den sociedad. Rosa Nurys a dedica tambe na embeyecemento, desaroyo y siguridad di e pais tratando di haci miho pa e atraccion local, no solamente pa e hendenan local disfruta, pero hopi enfoca den e confort y atraccion turistico. Su calor humano y amor incondicional e ta demostra tambe pa e animalnan y naturalesa.
Den e ultimo lunanan el a sinti su mes asina feliz na momento cu amor ta bati di nobo na su porta. Despues di tanto aña di soledad y dedica na sirbi, stimando y cuidando di tur cos cu ta na su alcance pa haci of aporta na humanidad. Rosa Nurys Godet ta comparti cu Focus Digital Magazine detayenan di su bida y su boda espectacular cu Francis Maduro cual ceremonia tabata riba beach durante un bunita bahada di solo. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
Mayo Stoppels
