El a cuminsa skirbi poema cu su 16 aña riba recomendacion di Meneer Anton Claassen na Avond Havo Aruba. Un persona cu ta observa, mira y sinti mientras como hoben semper el a gusta pinta cosnan abstracto di color. Ruthy Vrieswijk cu su nomber artistico Lady Ruth ta un personahe admira y respeta den nos comunidad. Su sonrisa, cordialidad y estilo di bisti ta caracterisa su personalidad artistico unico. Locual cu Lady Ruth ta encanta mas como artista ta skirbi y recita su poemanan di tur tema y estilo den cuater idioma. Su hobbynan ta baila, canta, biaha, sali come, pinta cuadranan abstracto, skirbi y recita poema.
Ruthy a tene varios exposicion di su pinturanan na e.o. BNA y na Instituto di Cultura. Como e tin cantamento como un di su hobbynan, el a tribi di presenta tres “One woman show” den Cas di Cultura. E tin cinco cd graba cu poesia y tres cantica riba cd, di cual dos ta di Pasco na Papiamento y un cancion pa Dia di Tata, cu tambe ta na Papiamento. Como autor e tin seis buki publica cu storia y poema pa hoben y adulto. Entre nan su ultimo buki, cual ta su prome storia na Papiamento pa mucha “Rene su dushi wega”. Inspira pa su amor pa traha cu e muchanan den Scouting y su amor como wela.
Lady Ruth su fuente di inspiracion ta su fe den su amor y alegria pa Creador Dios, pa su mes y pa su prohimo. Su amor pa naturalesa y e bunitesa den nos cultura. Lesa e interesante entrevista cu Ruthy Vrieswijk den Focus Digital Magzine, cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
