E tres super heroe The Powerpuff Girls cu Zia tabata encanta cu ne, a converti den su pasatempo pintando mas tanto su dos faboritonan Blossom y Buttercup. Despues el a bira super entusiasma cu Naruto recordando awo na grandi con tur dia e tabata pinta e caricaturanan di e show. Como teenager e tabata gusta pelicula y show anima manera Gravity Falls, Tangled y Steven Universe. Zia tabatin un art account riba Tumblr y Instagram unda e tabata post su arte y bay live. Alabes conecta cu artistanan rond mundo cu a inspira su estilo di pinta. Pues di chikito Zia tabata gusta mas e estilo di anime pero awor como adulto e ta pinta mas cartoony cu inspiracion di anime.
Durante Zia Alexia Habibe su junior year na FHTMS na Universidad di Aruba su klas di MICE mester a organisa un evento caritativo. Nan a dicidi pa haci un dog walk “Walk for Paws” pa recauda fondo pa Aruba Animal Shelter. Zia a pinta pa e mercadeo di e evento tanto e logo como e artenan cual a wordo uza pa posters, tickets y stickers resultando den un gran exito. Otro proyecto cu Zia a forma parti tempo e tabata miembro di Rotaract Club of Aruba tabata “Pasa Pret” cu Rotaract. E tabata encarga pa traha e artenan promocional y e ilustracionnan pa e muchanan pinta durante e evento como tambe pa promove e actividadnan. E proyecto aki a gana premio di Rotaract Club na nivel internacional.
Artista caricaturista y live painting ta algo cu semper a atrae Zia y mirando diferente artista online, el a gusta con nan ta captura e esencia real di e persona nan dilanti. Su debut na Art Fair e aña aki haciendo live painting a bay super great. E oportunidad unico aki a surgi for di un pintura riba canvas cu Zia a haci durante fiesta di cumpleaños di un prima chikito. Tito Bolivar a wak e pintura riba WhatsApp story di Derchlien Dijkhoff, mama di e cumpleañera, y Zia a haya un yamada mesun dia pa un reunion pa forma parti di Art Fair. E tabata hopi emociona, pero tambe nervioso y hopi contento cu e por a haya e oportunidad aki. Semper el a desea ta parti di Art Fair, unda pa prome biaha cu el a bay tabata cu Rietveld Academy na 2016.
Pa Zia por a forma parti di Art Fair 2025 e mester a sigui e curso di oil painting duna pa Peter van den Heuvel, pa asina e por a refina su habilidadnan artistico. E tabatin alrededor di 4 aña sin pinta y e curso aki a yud’e hopi pa haci algo nobo y drenta den e ‘creative mindset’. E proceso pa un sesion di pintamento en bibo tabata algo full diferente. Art Fair tabata e prome biaha unda Zia a pinta hendenan al instante. El a prepara dos siman largo, purbando diferente estilo di pinta hende – di realistico pa mas cartoon – y tambe el a experimenta cu diferente material manera acquarel, potlood y acrylic. E ta bisa cu bo mester ta sigur cu cual material y den cua estilo bo ta bay pinta door cu bo ta mara na tempo durante live painting.
Locual ta keda e miho experiencia pintando den caya di San Nicolas ta con su booth semper tabata yen! Como ta Zia su prome biaha e no tabata sa con e lo bay, pero el a hay’e asina nice cu e personanan cu a bin su booth a dun’e chens pa pinta nan. Hopi persona no conoce su arte ainda, pues e ta haya hopi special cu nan a ‘give it a shot’. E ta un bunita recuerdo y e ta sinti great ora e por pinta un persona su esencia. E satisfaccion ora un persona gusta e pintura cu e ta haci di nan, paso e ta realmente sigura cu e ta wak tur detaye. Zia gusta captura un persona su personalidad y e ta haya leuk ora e por ‘capture e moment’.
Den Focus Digital Magazine di october, Zia Alexia Habibe ta conta di e temporada cu el a cuminsa explora den arte digital y cu actualmente e gusta pinta riba Clip Studio Paint of Procreate door di e flexibilidad di cambia e pintura durante cualkier fase. Ora ta papia di pintamento tradicional, e gusta pinta cu potlood y aquarel. Lesa e entrevista completo den e revista di e luna aki, cu ta accesibel via Apple Store, Android Google Play Store y www.focus.aw (Menu Tab FOCUS DIGITAL)
