WOW ARUBA CU CAMPAÑA HUNTO CU “MIRA NOS”

WOW Aruba (Women Empowering Women) cu hopi emocion y orguyo a anuncia e lansamento di nan comite nobo – Advocacy Committee – cu ta encabesa pa Darice Solognier. Como e prome proyecto nan ta sosteniendo e Mira Nos Campaign, un iniciativa cu ta inspira y cu tin como meta pa motiva damanan pa haci ‘self-checks’ y pa detecta trempan, specialmente e grupo menor cu 45 aña. E campaña aki a wordo funda door di un miembro di WOW, Gilliany Oduber, un recien sobreviviente di cancer di pecho. Y como cu parti di WOW su promesa ta pa apoya y curasha nan mes entre hende muhe – cu honor nan ta sostene y apoya e bunita proyecto aki di Mira Nos.

October ta e luna di conscientisacion pa cu cancer di pecho, den colaboracion cu Stichting ABO, e Advocacy Committee ta activamente promoviendo e campaña door di colecta fondo pa dos fundacion renombra specialmente pa locual cu ta trata cancer di pecho: Mary Joan Foundation y Koningin Wilhelmina Fonds. E miembronan tambe lo sirbi como embahador pa trece conscientisacion y pa motiva damanan den nos comunidad pa inclui self-checks como algo regular den nan rutina di salud. Cu e esfuerso aki, WOW Aruba kier kibra tur barera di miedo y incredulidad, pa asina stimula un cultura di salud pro-activo y deteccion trempan.  

WOW Aruba ta invita e hende muhenan pa join nan pa un Breast Boost cu Dr. Soraya Vallejo y Dr. Maria Gemma Vallejo hunto cu un dosis di ‘pink power’ for di Diantha Nuesch di Fundacion ABO. E evento aki ta tuma luga na The Hub na San Nicolas riba diaranson dia 22 di october for di 6:15 PM pa 8:30 PM y dress code ta ‘Think Pink’.  Na WOW Aruba nan ta hopi honra y contento pa haya sosten di nos comunidad den cualkier di nan proyectonan activo.