ROSA VAN DER BIEZEN: “CANCER DI PECHO NO TA UN SENTENCIA DI MORTO”

Rosa a scoge pa biba y kier tin goso den su bida. E palabra ‘sobreviviente’ p’e ta wordo asocia cu un lucha constante cu no tin fin. P’esey e ta prefera di bisa cu bos firme y cu positivismo: “MI TA BIBA.” Rosa a haya e diagnostico di cancer na su pecho banda drechi na september 2007. Sinta den consultorio di su dokter di cas, el a sinti cu su mundo a caba ora el a ricibi e diagnostico. E momento ey e no por a saca ningun palabra mas, paso p’e ya no tabata existi futuro mas. Rosa a yora tres dia largo y no kier a papia cu niun hende.

Rosa tabatin dolornan bou su brasa y su pecho drechi a hincha poco. El a bay dokter y el a haya tratamento di antibiotica pa 3 luna pa combati inflamacion di melkklier, segun e dokter a constata. Despues di 3 luna e situacion a bira pio. Su pecho drechi a sigui crece y bira duro comosifuera ta un cirugia el a caba di haci pa aumenta pecho. Esaki a pone su dokter pidi pa haci un mammografie cu urgencia. Den menos di 2 dia el a haya e diagnostico di cancer na su pecho banda drechi. 

Despues su dokter di cas a pas’e pa un specialista ciruhano. Rosa a pidi su mama pa compañ’e pa e cita y aki el a haya informacion detaya di su situacion. Su pecho drechi tabatin 2 tumor, un mama y su yiu. El a wordo manda cu urgencia pa biopsy y den menos di 5 dia el a drenta hospital pa opera e tumornan, cu segun e biopsia stage 4 di cancer di pecho. Aki e situacion a dal un buelta 190 grado, paso durante e operacion e ciruhano a bin constata cu no tabata trata di 2 tumor solamente.  

Rosa tabatin un mama tumor cu su 49 yiu tumor, cu tabata te patras di su lomba. Awor ora e pensa bek den pasado, e ta conclui cu esey tabata origin di su dolornan di bou brasa. E ciruhano tabata teme cu su pulmonan tambe por tabata afecta y el a laga haci mas test. Rosa ta gradici Señor cu su pulmon tabata bon. Aki e caminda pa prepara pa sigui cu tratamento a cuminsa. E plan di tratamento cu ciruhano a duna, operacion y radioterapia, cu un total di 33 biaha di cada uno entre 1 pa 5 minuut y kimoterapia pa 10 luna.

Rosa a bolbe Aruba despues di radioterapia y a sosega pa 6 siman pa e por a cuminsa cu kimoterapia. E proceso aki tabata un sla hopi duro, paso e ta un hende muhe cu semper gusta luci bunita. Rosa a cuminsa perde cabey den e prome luna, despues tur cabey riba su cabes y su wenkbrouw. Despues di 8 luna el a haya un stroke, cu casi el a hera muri. El a recupera pocopoco y despues di casi 1 aña su cabey a cuminsa crece bek sin cay mas. Sinembargo door di e tratamento hormonal el a subi hopi peso te yega di 180 Kilo.  

Ora otro hende muhe puntr’e con e por briya asina fuerte despues di tur cos cu el a pasa aden, e ta smile y bisa:”Bida a pone mi bou di hopi presion, pero bida a mustra e Diamante Ros cu tabata den mi”. Awe, 18 aña despues, su bida ta carga su historia manera un joya, un PINK Diamond, pa inspira otro: bo tambe por briya, bo tambe mustra bo splendor, no importa con duro bida a trata bo. Presion cu a keda trata pa kibra bo, na final ta pone bo briya cada bes cu mas luz.

Rosa ta conta den Focus Digital Magazine di october con el a persevera y surpasa metastatic breast cancer y siña biba cu realidad. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)