Canchi ta un di e telanan cu nunca realmente ta bay for di moda. Antes e tabata algo cu solamente e hendenan rico tabata bisti — e tabata simbolisa luho, elegancia y status. Pensa riba e shimisnan di realesa, kraagnan cu adorno y detayenan refina. Pero awendia canchi ta pa tur hende. Bo ta mir’e den top, shimis, saya y hasta sneakers. E diseñadornan ta uzando esaki den maneranan nobo: tof, speels of djis super romantico. Loke ta haci canchi asina special ta cu semper e ta agrega algo extra na un outfit. Un simpel par di jeans y un top di canchi? Instantaneamente chic.
E Set di Saya y Tendencianan di Moda Actual. E set di saya ta leu di ta “moda bieu” y ta haciendo un regreso fuerte den e mundo di moda, pero cu un cambio moderno. Diferencia den largura di saya: Mientras cu e saya potlood te na rudia ta keda un clasico, nos ta mirando tambe hopi saya-midi (largura te memey di batata di pia) y hasta mini-saya combina cu un blazer pa un look mas hubenil y casual. Y no lubida e tas cu ta completa e look. E set di saya no ta djis pa trabou; pero awendia nan ta perfecto tambe pa un salida anochi.
Lila – Biña – ta Bek! Durante e herfst aki nos a mir’e tur caminda. For di tononan aubergine profundo te na lavander suave, biña ta dominando pasarelanan y tambe streetwear. Pero dicon biña? Y con bo ta bisti’e sin cu e ta bira di mas? Con pa bisti color biña?
• Casual: Combina un sweater color lavender cu jeans y sneakers blanco pa un look fresco y speels
• Profesional: Un blazer biña scur ta transmiti confiansa sin ta demasiado fuerte. Perfecto pa bisti pa reunion of presentacion.
• Anochi: Scoge seda of felpa den tononan biña scur — elegante, misterioso y atemporal.
Sigui e trends den e mundo di moda cu e fashionista, Swesdy Beeldsnijder, den Focus Digital Magazine su highlight: InStyle! E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
