Aruba Airport Authority N.V. (AAA) a trece hunto stakeholdernan clave di e industria, representantenan di gobierno y partnernan di Aeropuerto pa un sesion reconociendo Inmigracion Aruba (IA) pa nan sosten inigualabel den eherce nan rol, no solamente como control di frontera pa Aruba, pero tambe un contribuyente importante na e totalidad di proceso y experiencia di pasahero durante e ultimo 11 lunanan y preparacionnan di alineacion pa e temporada halto di biahe venidero.
E sesion di mainta a cuminsa cu un presentacion di Jo-Anne Arends, Aviation Business Development Executive na Aruba Airport Authority, kende a duna un bista di e rendimento di trafico di october di aña pa aña (YTD). El a informa di un aumento di 6% na trafico di pasahero, impulsa pa un transporte aereo expande pa e temporada di winter y a anuncia desaroyonan clave, incluyendo rutanan nobo y frecuencianan di buelo adicional. E puntonan resaltante ta inclui: LATAM su vuelo mas nobo pa Bogotá, KLM su aumento di dos vuelo adicional pa e temporada di winter, compania di aviacion nobo Aerolíneas Argentinas lansando cinco vuelo semanal y Copa Airlines ta agrega tres vuelo adicional di anochi cuminsando na januari 2026. En total, mas cu 400 vuelo extra ta programa entre 1 di november 2025 y 31 di maart 2026. E presentacion tambe a resalta cu Inmigracion Aruba a procesa 2.8 miyon pasahero drentando y saliendo e aña aki, cu movecionnan di pasahero pronostica pa alcansa 3.3 miyon pa fin di e aña aki.
Tambe a reconoce e importancia di colaboracion di henter e comunidad di Aeropuerto, cu Jo-Anne Arends bisando: “E sesion di awe a permiti nos pa revisa e datonan, comparti desaroyonan venidero y percura pa tur partner ta prepara pa un skema exigente di winter. E contribucion di Inmigracion Aruba ta un componente clave di nos preparacion operacional y nos ta aprecia nan colaboracion continuo segun cu nos ta move den e siguiente fase di crecemento.”
E sesion a continua cu remarkenan di Minister di Turismo, Labor y Transporte, mr. Wendrick C. Cicilia hunto cu Gerald Fingal, Consehero di Ministerio di Husticia, kende a papia den nomber di Minister mr. drs. Arthur L. Dowers. Ambos a destaca e compromiso di gobierno pa sostene e team di IA y a reenforsa e rol esencial cu oficialnan di Inmigracion Aruba ta hunga como e prome pa yama bonbini na pasaheronan yegando Aruba.
E CEO Interino di Aruba Airport Authority, James Fazio, a duna datonan actualisa di e proyecto di expancion di aeropuerto, delineando progreso y siguiente metanan clave. E sesion a sigui cu e CEO di Aruba Tourism Authority, Ronella Croes, cu a comparti e vision strategico di e destinacion y e proximo iniciativanan turistico.
Un total di 35 oficial di Inmigracion Aruba a asisti na e sesion. Como muestra di aprecio, a rifa cuater voucher di biahe entre e oficialnan cu a participa na e sesion informativo.
Pa clausura, Aruba Airport Authority a expresa su aprecio na e team di Imigracion Aruba pa nan profesionalismo continuo y rol clave den mantencion di procesamento eficiente di pasahero prome cu e temporada di winter di volumen halto mes cuminsa.
