Mayoria biaha nos ta pensa riba gratitud manera un “danki” pa respet — un palabra cu nos ta bisa ora nos ta na mesa of pa costumber. Pero gratitud berdadero no ta un pensamento; e ta un energia. E ta biba den nos curpa, den respiracion, den e calor cu ta sali for di bo pecho ora bo ta tuma un momento pa mira e cosnan bunita den bida.
Ora bo permiti bo mes pa sinti gratitud, algo maraviyoso ta pasa: bo sistema nervioso ta relaha. Bo respiracion ta bira mas profundo. E curason ta habri y hunto cu esey, e capacidad natural di placer den bo curpa ta lanta. Gratitud y sensualidad ta amante. Un ta nutri e otro. Aprecio ta crea siguridad y siguridad ta laga deseo floria.
Prome cu nos finalisa e aña aki, Dina Alexander ta invita bo pa traha di bo gratitud un practica sagrado y sensual.
Cuminsa na duna bo Curpa Danki: Tur mainta, pone bo man riba bo curason y fluister gratitud na e parti di bo mes cu regularmente bo ta ignora. Bisa: “Danki pia… pa carga mi. Danki bariga… pa bo sabiduria. Danki boca… pa papia berdad”.
Si bo tin un partner, purba un Ritual di Aprecio. Sinta dilanti otro, hala rosea, y bisa tres cos cu bo sinceramente aprecia di otro — no mester ta algo gandi, pero e cosnan chikito y sincero. “Mi stima manera bo energia ta calma mi.”… “Mi ta agradecido na bo pasenshi”.
Y finalmente, haci e practica di Respiracion di Gratitud: hala rosea y pensa “Mi ta ricibi”. Saca rosea y bisa pocopoco: “Danki”. Sinti con e ritmo aki ta hiba bo bek den bo curpa.
Gratitud ta manera magia. E ta cambia pobresa den abundancia, tension den trankilidad, costumber den devocion. E ta recorda nos cu placer no ta un premio cu bo ta gana, sino un estado cu nos por scoge, momento pa momento.
E december aki, no djis conta bo bendicionnan — sinti nan. Laga gratitud captura bo sentido. Laga e lanta e amante sagrado den bo mes – Cada “danki” ta un carta di amor y bo curpa ta scucha. Si bo a conecta cu locual bo a lesa, bo por semper tuma contacto cu Dina Alexander, ken ta comparti su consehonan den Focus Digital Magazine cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
