E tin tres decada laborando den medio di comunicacion y ta bisa cu e no por sin su camara. Cornel Djaoen tin un camara tur ora cu ne, sea ta na trabou, na cas of ora e sali bay un caminda. E ta sinti mesun pasion manera for di su inicio y gusta cu cada dia e ta lanta cu gana pa haci algo diferente pa e televidentenan no cansa di e imagen cu nan ta wak constantemente. E tin 9 aña cu e programa “Racha di Boxeo” cu ta pasa tur diasabra 8 PM na Telearuba Canal 13. Pa Cornel e miho manera cu e por wordo discribi ta como “E Cameraman di Telearuba”.
Cornel Djaoen a cuminsa traha na aña 1996 cu CSS Canal 24, Caribean Super Station, cerca Paty Lacle (den feliz memoria). El a dun’e oportunidad pa siña cameraman y eynan el a traha 2 aña hunto cu personanan conoci manera Norman Thijsen di ken el a siña hopi. E programa famoso e tempo ey tabata Your Choice TV. Cornel a sigui na 1997 cu ATV Canal 15, unda el a traha 3 aña como cameraman y despues el a bay Hulanda pa 4 aña.
Ora Cornel a bolbe na 2004 el a haya su trabou mesora bek cu ATV. El a sigui como Cameraman y tambe truck energy y director (switcher) den truck. Na 2010 el a drenta Telearuba como Cameramen, pero den tur e añanan el a siña riba su mes pa ta editor, productor, director tecnico y con por haci full un live streaming. Esey tabata otro parti den e mundo di television, cu a bira mas moderno y mas facil y lihe pa haci transmision live. Sin tin mester di full un truck pa haci transmision.
Cornel Djaoen no por bisa e ta un cameraman cu hopi cambio di camara a pasa den su man. Di camara y camara recording tabata 2 pida y pisa. Asina bayendo te cu aworaki y celular tin casi mesun calidad di un camara. Presentacion y palabranan no tin hopi cambio, pero decoracion tin un cambio hopi grandi, for di cortina pa LED TV! Den Focus Digital Magazine di e luna aki, Cornel ta comparti cua ta un momento memorabel cu el a capta cu su camera. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
