Fitville Aruba ta un festival di fitness anual di 3 dia cu ta un di e miho competencianan den su categoria den Caribe. E enfoke ta pa celebra bienestar, comunidad y bida. Na Fitville ser activo, come saludabel, disfruta bida cu famia y amigonan ta e obhetivo. E competencia di “Fitville Functional Fitness” na 2017 a conta cu un total di mas di 2500 espectador y casi 100 atleta, cu a representa diferente pais y gym na Aruba. Pa e edicion di 2018 nan ta uni forsa cu Funstacle Masters, cu sea bo ta domina e fun of e obstaculonan. Nan tin nan propio historia di organisa eventonan deportivo na Aruba, Bonaire, Curacao y cu mas di 2000 participante.
Tres dia di entrenamento multiple contra un monton di atleta y ekipo di henter Caribe, cu ta for di awe diabierna te cu diadomingo dia 9 di september. Fitville ta un competencia di ekipo cu ta invita atletanan for di rond mundo, cu ta consisti di dos atleta di e mesun sexo. E highlight di e competencia aki ta su coleccion di e miho atletanan den Caribe. Mientras cu e atleta mas fit lo ta demostrando su maximo capacidad pa ricibi e premionan, lo tin un dosis igual di seminario, clinics, demostracionnan, exposicion di producto, cuminda, musica y baile. Lo bay crea un experiencia total pa henter famia y bishitantenan na Harbor Arena.
