Dia 8 di maart ta celebra “Dia Internacional di Hende Muhe”, un dia pa lucha pa igualdad, participacion y e empoderamento di e muhe den tur area di e sociedad. E dia aki ta wordo celebra na hopi pais na mundo y na algun di e paisnan aki e ta un fiesta nacional. Na Aruba tambe e dia aki ta wordo celebra, mustrando e aprecio y balorando nos propio hende muhenan. Empodera un hende muhe kiermen cu nos ta referi na e proceso, pa cual e muhenan, den un contexto cu nan ta den desbentaha pa e bareranan structural di genero, ta adkeri of reforsa nan capacidadnan, nan strategianan y ta alcansa un logro di bida ehemplar, unda e tumamento di decision y actitud den tur momento ta refleha e ser femenino den su totalidad. Y cu esaki den mente y vision, a selecciona algun di e hende muhenan cu a forma parti di revista FOCUS, empoderando asina cada ser femenino di nos dushi isla Aruba pa hopi aña mas.
EVELYN WEVER CROES
Na 2017 Evelyna “Evelyn” Wever Croes a marca historia como e prome hende muhe Minister Presidente. El a drenta den politica cu un vision pa crea mas oportunidad pa nos muchanan y hobennan, specialmente hende muher. Den transcurso di tempo e vision ey a bira mas amplio, ora cu na 2011 el a asumi liderazgo di partido MEP. Desde e momento ey su meta den politica ta pa restructura y fortifica e partido y prepara e partido, pa asumi responsabilidad den gobernacion. Awor como Minister Presidente di pais Aruba, su vision ta, pa crea un mihor Aruba pa tur ciudadano, irespecto, unda bo a nace.
IRENE VAN DER LINDE
E trayectoria di Irene van der Linde a inicia ora el a bay studia na Hulanda como Medisch Microbiologisch Analist HBO y a traha na Sint Franciscus Gasthuis. Despues cu el a casa el a bay Colombia unda el a siña hopi trahando como boluntario den un laboratorio priva. Na aña 1986, despues di Aruba su Status Aparte, Irene a establece e prome laboratorio priva na Aruba den Clinica Carabobo y na aña 1989 el a logra su NV, cu ta IL Laboratorio Familiar NV. Irene tin awor mas di 40 aña dedicando na e profesion aki y dunando su aporte na beneficio di salubridad na comunidad di Aruba.
MARRIT GORTER
Marrit tabatin apenas 22 aña, tempo el a cuminsa bula, a sali na estado y a dicidi di tin un famia prome y si despues e tabatin interes pa sigui bula, esey lo por a sosode. Sinta na Schiphol wardando pa aborda un avion di KLM, mientras cu e tripulacion tabata pasa su dilanti, el a nota cu e tripulacion tabata uno completamente femenino. Tabata na e punto ey, cu el a realisa cu e mester cuminsa bula atrobe y sigui su soño. Marrit a bira e prome piloto femenino comercial di Aruba. Su prome buelo tabata excitante y su prome landing den Airbus tabata na Aruba.
NALINE HEILBRON
Su cara no ta uno desconoci. Hopi hende a mir’e, ora cu e tabata presenta noticia na television algun aña pasa, na Telearuba. Awe, 8 aña despues, Naline ta bek como un empresario social y presentando un proyecto di cosmetico, unda e mester a specialisa su mes den e materia, pa asina yega na un producto final, cu por a haya acogida den comunidad. Su motivacion tabata grandi: su mama y su ruman, cu ta sufri di epilepsia y tin limitacion visual. Enfocando riba habilidad y no den limitacion, Naline a logra produci un habon 100% natural: Ha’ Bon Aruba, cu participacion di e personanan cu limitacion.
SHARON FRÄNKEL
Sharon Fränkel su trayectoria profesional a cuminsa na 1985 na Hulanda, na un compania di Factoring (NMB Heller). Na 1990 el a inicia su carera den e mundo bancario na St. Maarten, unda el a traha na ABN AMRO. Durante e añanan 1990 te cu 2004, Sharon a ocupa diferente posicion na St.Maarten, Corsou y Aruba. Na maart 2004 Arubabank a acerc’e y el a join e famia di Arubabank, unda el a cuminsa como Manager Risk. October 2005 el a haya promocion pa Executive Director, formando parti di e team ehecutivo di banco y 5 aña despues, a promove pa Managing Director.
YELITZA DOMACASSÉ-HELMEYER
Yelitza Domacassé-Helmeyer na edad di 8 aña caba, tabata sa cu un dia e lo por a bira dentista. El a sigui su soño y cu diploma den man, el a bolbe Aruba. For di 2009 Yelitza a cuminsa eherce su profesion den su propio consultorio Helmeyer Dental Clinic. Riba social media e ta purba encurasha cu e pensamentonan y actitud positivo, encurashando pa nunca “give up”, te ora bo logra locual bo kier. E ta forma parti di Kiwanis Club of Aruba y ta na encargo di e proyecto ‘Smile Maker’, caminda e muchanan di menos recurso por bin haci nan djente sin costo.
DEIRDRE SNOIJL
Deirdre Snoijl banda di eherce e trabou extraordinario di Vice President Program Project Management na AIB Bank N.V., e ta mama tambe di e morocho: Khloe Mia y Sophie-Belle (8 aña). E funcion di mama ta yen’e cu satisfaccion enorme, pero no por kita afo, cu e ta encanta su funcion laboral tambe, ya cu esey ta parti di su persona. Deirdre semper ta refleha un estilo espectacular y elegante di bisti, combina cu un caracter y personalidad unico, cu ta hacie un muher realmente exitoso den tur aspecto. Hunto cu su pareha Pierre, nan ta lanta y educa nan princesanan y ta disfruta plenamente di nan bida y hogar.
DOCTER LOUISE RAFAËL-CROES
Desde di 1997 cu Dokter Louise Rafael-Croes a finalisa su estudio como pediatra na Hulanda, el bin traha na Aruba unda el a atende un sinfin di mucha, cu awendia ta adultonan cu ta recorde cu un cariño special. Como hende muher semper Louise mester a demostra cu e por haci su trabou, pues e mester a traha dobel duro, pa nan respet’e como specialista. Dokter Rafael-Croes ta un persona cu semper a vocifera su deseo pa nos tin un Aruba saludabel, feliz, sin abuso di mucha y sin violencia domestico.
CLAUDIA PONSON-DAHER
Claudia ta un persona clave hunto cu su famia den Do it Center y tambe tin su impresionante proyectonan di construccion di Daher Residence na Aruba Racquet Club y Daher Hotel. Claudia su 3 retonan di mas grandi den su funcion den Do it Center ta, pa haci e compania bira cada dia mas completo y prospero, apoyando su casa, su yiunan y tur trahador na tur momento. Sirbi Aruba cu prijs husto y servicio sin igual. Claudia ta mira cu cada dia mas muhe ta sigui haci e diferencia y e cambionan positivo den diferente sector.
GIGLIOLA GOMEZ
Gigliola ta un diseñadora di moda di Aruba, cu ta representa e di 4 generacion di hende muhe den su famia cu ta practica e arte di cose paña. Gigliola a crece entre tela y costura y for di e tempo ey, su pasion a bira mas grandi cada dia pa e mundo di moda.Su kerida mama y wela, ambos tabata cose y el a cuminsa diseña como tiener y tabata bisti su mesun estilo di paña desde tempo ey. Awendia su focus ta den e diseñonan unico, colorido y ‘flowy’, diseña cu mesun cuido y comodidad, cu su ancestronan tabatin den mente e decadanan pasa.
GWENDOLIN KOCK CROES
Diadomingo 11 di november 2018, Wendy hunto cu otro 4 landador a sali di e bahia; Tomate, pa landa direccion pa Aruba. Wendy a land’e den 10 ora y 2 minuut y el a yega net na e rif poco pariba di Renaissance Island. Di eynan Wendy mester a landa rond di e rif, pa asina yega na Nikki Beach, unda tabatin masha hopi hende mes; di grandi te chikito, wardando riba su yegada. E tabata hopi emocional pa Wendy, paso ta prome biaha un hende muhe ta logra landa di Venezuela pa Aruba.
OSYTH HENRIQUEZ
Como e prome ‘hotelier’ femenino na Aruba, awe e por papia exitosamente di Osyth su logronan y su entusiasmo di por duna naturalesa un ‘second chance’. El a desaroya e proyecto hotelero, Ocean Villas, cual ta caracterisa pa ta algo unico na Aruba cu e bungalows di palo riba awa. Osyth gusta combina su creatividad den e construccion di su proyecto, pa crea un bungalow y combina su decor unico. Su trayectoria a inicia na e restaurant The Old Man and the Sea, pa despues desaroya e proyecto di Ocean Villas. Tambe por papia di otro proyecto exitoso, manera; The Flying Fishbone y Casa Alistaire.
SUE-ANN LACLÉ RAS
Un eror cometi, aunke hopi ta pensa cu e no tabata un eror sino un simpel descuido, a pone Sue-Ann sinti cu e miho cos pa haci, tabata pa retira como Parlamentario aña pasa. Loke a sosode cu e ‘episodio’ di wak Netflix na un momento inoportuno, media a haci mas grandi di loke realmente e tabata. Detaye di e momento ey, ya awor no ta relevante. Importante awor ta cu Sue-Ann ta spera cu e paso cu el a tuma por laga un stempel atras, cu hopi por uza como un ehempel di kico ta lo corecto cu mester haci, pa asina demostra e nivel di integridad y caracter.
MAYRÈNE MARUGG-HELMEYER
Mayrène Marugg-Helmeyer no ta un figura desconoci y sigur un persona cu a sa di resalta pa su beyesa, inteligencia y carisma unico. Recientemente Mayrène a haya e noticia cu e ta apunta como un notario y por cuminsa eherce su funcion. Cu e comienso di e carera nobo aki, Mayrène kier brinda su futuro clientenan un servicio exepcional y eficiente, basa riba su tantisimo aña di experiencia. Mayrène ta convenci cu digitalisacion den mundo notarial ta di sumo importancia, pero esaki mester ta den bon coordinacion cu e diferente instancianan gubernamental.
