E dos yiu muhernan di Sue-Ann Laclé Ras, Sue-Gin y Ginayla, ta studiando na Hulanda. Siman pasa nos a haya e punto di bista di Sue-Gin Arends riba e situacion di su bida na Hulanda leu di su famia memey di e crisis di COVID-19. Su ruman, Ginayla Arends, ta bibando na Groningen, Hulanda desde augustus 2019. Actualmente e ta den su prome aña di International Business Studies na Hanze Hogeschool.
Personalmente, e ta hay’e un tiki fastioso, paso bo sa cu e situacion na Hulanda ta bayendo fo’i man y e tambe ta biba eynan. E ta preocupa pa su famia na Hulanda, pero tambe na Aruba, pa nan ta ‘safe’ di tur esaki. Ginayla lo desea di bay cas cerca su famia, pero mester compronde cu esey awor no ta posibel. Mester djis sa cu e pensamentonan ey ta actua riba bo emocionnan, en bes di wak loke ta mas realistico y miho.
Ginayla ta haya cu Minister President ta haciendo hopi bon pa purba contene e virus. Paso mirando e capacidad limita den hospital cu Aruba tin, nos mester purba contene e virus mas abou cu ta posibel. E ta irita si, con nos mesun hendenan no ta compronde con erg e situacion por bira, y con peligroso e por ta pa nos grandinan como tambe esunnan mas vulnerabel. Como bon ciudadano nos mester compronde cu si no tuma accion awo, e cosnan ta bay fo’i man y despues ta mucho laat pa controla e situacion y Aruba no por wanta un sla asina.
Con bo ta mantene bo mes positivo durante e crisis aki?
Mi ta kere e miho cos cu por haci ta purba mantene un rutina. Paso ta berdad cu tin dianan bo ta sinti bo mas down cu otro, pero mester pensa cu esaki ta temporario y no ta asina pa semper. Algun cos cu ami sa haci ta, zorg pa mi camber ta mas limpi y mas organisa, haci ‘home workouts’, videocall cu bo sernan keri (mas cu normal) y ora tin solo mi sa sinta pafo y disfruta tiki di esaki tambe.
Un conseho di conscientisacion pa e comunidad?
Pa tur hende duna di nan banda y pensa riba e gruponan vulnerabel y cu nos sistema di cuido no tin capacidad grandi pa acapara tur e casonan di coronavirus si mester tin un ‘outbreak’ y mucho menos si e casonan bira complica.
