Como fundador y organisador di Miss Aruba Online, Hendrik ‘Endy’ Croes, ta sumamente contento con e certamen ta canando. Nan a cuminsa cu djis e idea pa trece un cambio den e mundo di beyesa, y a “probecha” di e situacion mundial unda cu tur hende mester mantene ‘social distancing’ pa por organisa un certamen cu un dinamica nobo y diferente. E certamen ta basicamente riba INSTAGRAM so, pues na ningun momento niun candidata ta topa otro di forma personal. Mirando e cantidad di ‘follower’ cu tur dia ta aumenta, Endy ta sinti cu nan ta treciendo e mensahe pa redefini e standardnan di beyesa na mas y mas hende.
Te cu aworaki cu nan a caba di lansa 4 challenge, e comentario di e audiencia ta hopi positivo. Hopi ‘follower’ ta probecha di e temporada y ta activamente siguiendo cada paso di e 11 candidatanan. Ya caba nos por cuminsa ripara cu nan ta formando nan decision ken ta nan faborito, aunke cu ainda tin varios challenge pa bay. Si mira e cantidad di LIKES cu cada candidata ta haya, e ta duna e impresion cu di berdad nan cantidad di fanatico tambe ta creciendo.
Ta sinti cu ta logrando e meta tras di e concepto innovativo aki?
Sigur cu si! E certamen no ta manera e certamen tradicional. Nos reglanan ta permiti hopi mas candidata pa inscribi, pasobra nos a kita tur e presionnan tradicional cu un reina di beyesa tin ora di competi den un certamen di beyesa. Figura no ta importante, estatura no ta importante, estado civil no ta importante, etc. Aworaki e huradonan ta husga puramente e esfuerso inverti di cada participante den cada challenge, pues e atencion riba estetica tradicional no tey. Tur candidata mester percura pa nan haci cada challenge di e mihor forma posibel pa por resalta den e grupo grandi di candidata. Aki contenido ta sumamente esencial.
“Na ningun momento e grupo ta encontra cu otro”
Con ta anda cu e certamen cu e ‘social distancing’ y #kedacas?
Special pa esaki a prepara challenge 3: “If I was the Prime Minister I would”, pasobra a pone enfasis riba e medidanan di precaucion pa nos por surpasa e temporada aki mas lihe cu ta posibel. Y mester corda tambe cu na ningun momento e grupo ta encontra cu otro y mayoria di e candidatanan ta haciendo tur e challenges na nan cas mes pa mantene nan mes na e medidanan di prevencion.
Por splica en corto di e siguiente 6 challenges?
E challengenan cu ta sigui ta: Respect the queens! – Keepin’ it Real – Confidence is Key – Eleganza Extravaganza – Chit Chat with the judges – Instagram votes. Loke tin na caminda ta campañanan interesante contra ‘cyber bullying’ contra reinanan di beyesa, e candidatanan lo bay LIVE riba IG, e candidatanan lo manda video di nan den trahe di baño y shimis largo, tur candidata lo tin entrevista priva cu hurado y na final, dia 25 di April lo conta tur e votonan riba IG pa por duna e puntuacion na cada candidata tambe como e ultimo challenge. Challenge 10 a cuminsa for di momento cu e prome challenge a wordo poni riba e IG di Miss Aruba Online.
E VOTACION BEST TO WORST
Tur hurado ta vota pa cada challenge den forma di un ranking, dus ken pa cada hurado a keda na prome lugar (11 punto), di dos lugar (10 punto) te ora cu yega na di ultimo lugar (1 punto). Esaki ta pa preveni cu un hurado por score 2 of mas participante cu e mesun puntuacion. Tur ta bon, pero toch semper tin 1 cu a resalta mas den bista di cada hurado. Despues di cada challenge ta publica e 5 candidatanan cu e scorenan mas halto for di huradonan. Esaki sigur ta tene e nivel di suspenso halto cerca e candidatanan y e ‘followers’ cu ta apoya e candidatanan. E sistema di score aki a wordo splica pa Endy Croes na e reinanan y e huradonan mescos, pues e ta duidelijk pa tur hende cu di e forma aki lo vota pa tur challenge.
Ki dia ta anuncia e ganador y con e ceremonia di coronacion lo bay ta?
Dia 26 di April 2020 nos lo anuncia ken e ganadora di e prome edicion di Miss Aruba Online 2020 ta, pero e acto di coronacion y entregamento di premio lo tuma lugar asina cu ta ‘safe’ un biaha mas pa nos por topa nos tur hunto, hunto cu huradonan, hunto cu prensa y invitadonan pa por haci e coronacion oficial. Sigur nos ta trahando tambe riba algun sorpresa pa e dia aki. Ya caba a cuminsa pensa con Miss Aruba Online 2021 lo bira y desaroya. Ta explorando tambe pa haci mas categoria den futuro. Tecnologia ta brinda mas posibilidad y nos mester probecha di esey, sino nos lo keda atras. Nos no mag di keda atras riba e tereno di beyesa!
