Na londen un hues awe a duna rason na Meghan Markle, Duchess of Sussex, den su demanda pa violacion di privacidad presenta contra un corant sensacionalista britanico, pa publica un carta cu el a skirbi pa su tata, cu ken e ta mantene un relacion hopi tenso. E hues Mark Warby di High Court, a dicta cu e dukesa y ex-actriz tabatin un expectativa rasonabel cu e contenido di e carta lo permanece den un ambito priva.
Un portavoz a declara cu nan ta hopi sorprendi cu e huicio sumario di awe y ta decepciona cu nan a ser nenga di haya e oportunidad cu tur e pruebanan lo ser scucha y proba den un audiencia publico den un huicio completo. Nan ta considerando cuidadosamente e contenido di e sentencia y lo dicidi na su debido tempo si nan lo presenta un apelacion.
Meghan a cuminsa accionnan legal contra e grupo Associated Newspapers, editor di e corant Daily Mail, su version dominical Mail on Sunday y e website Mail Online, pa publica e partinan di e carta di 1.250 palabra cu Meghan a skirbi su tata Thomas Markle den e corant y e serie di articulo na februari 2019. E carta a wordo skirbi na augustus 2018, algun luna despues cu Meghan a casa cu prins Harry, den cual e tabata pidi su tata pa stop di papia cu prensa y di haci afirmacionnan falso riba dje den e entrevistanan.
