Revista FOCUS tabata presente na e acto protocolario Dia di Himno y Bandera 18 di maart 2018. Nos lo duna un bista riba e estilo di e Mandatarionan y nan Distinguido Esposo of Esposa na evento importante aki. Nos Arubianonan ta hendenan elegante y di bon gusto, y FOCUS ta ‘highlight’ e siguiente mandatarionan.
Minister Chris Romero
Minister Chris Romero ta un fanatico di e fit moderno di un conhunto di bachi. Den e mundo sartorial esaki ta mas y mas acepta pa personanan den funcionnan oficial. Minister Romero tin un “charcoal blue” suit combina cu sapatonan den tononan blauw cu un tip scur, diferente enbes di e clasico preto. Personalisa cu un “flower pin” y lenso ta duna un toke den e ‘taste level’ di Minister Romero.
Minister Andin Bikker& Esposa Lorena
Minister Andin Bikker su conhunto den tono blauw scur combina cu un camisa blanco y dashi cora ta e estilo ‘american’ conoci den e mundo di moda. Complementa cu un combinacion clasico su camisa blanco y lenso blanco, adecuado.
E esposa di Minister Bikker, Lorena, a luci den cora cu un fascinator cu a keda apropia en combinacion cu un bunita makiyahe y peinado. E acesorionan cu a wordo escohi a keda sutil banda di e color cora vibrante. Di menciona ta, cu e pareha a ‘match’ nan outfits, aunke normalmente nos no ta fan di esaki, paso style preferiblemente mester ta individualista y colornan por completa otro sin ta mescos.
Minister Dangui Oduber y Esposa Naliza
Minister Dangui Oduber tambe ta un fanatico di e fit moderno, den e caso aki otro combinacion clasico den un tono cla di blauw cu ta duna un twist moderno na e color clasico aki. E ‘tailoring’di Minister Oduber su carson ta perfecto, un carson bon midi ta haci tur e diferencia.
E esposa di Minister Oduber, Naliza, a scoge tononan ivory pa e acto protocolario. E tononan aki a keda bunita den e ora di mainta. E sombre cu el a scoge kisas door di e biento fuerte no tabata e miho opcion pa e dia aki. Den otro oportunidad ta recomendabel pa scoge algo mas chikito y cu por resisti e biento fuerte.
Minister Xiomara Ruiz-Maduro
Minister Xiomara Ruiz-Maduro ta un dama cu ultimo tempo ta sorprende nos cu su estilo impecabel. E escogencia pa bisti un silueta clasico a favorece. Su fascinator, apropia y peinado clasico a keda bon pa e ocasion aki. Su asesorionan den un tono blauw scur a luci. Unico tip lo ta pa si e bachi tin un boton grandi, considera di laga e broche afo. Tin biaha, ‘less is more’. Sin embargo nos no lo focus riba esaki, pasobra nos a gusta e look por completo.
Prome Minister Evelyn Wever-Croes & Esposo Kenneth
Prome Minister Evelyn Wever-Croes a luci sublime den un shimis color blauw di shelo cu manganan den e forma di tulp. Fini, moderno y un fit impecabel. E combinacion cu asesorio den tononan crema a keda hopi suave, pero alabes cu un modernismo den su sapato estilo ‘sling-back’. Su esposo, Sr. Kenneth Wever, a bisti un suit cu un fit tradicional. E pareha a keda apropia pa e acto protocolario na Plaza Betico Croes.
Gobernador Alfonso Boekhoudt & Esposa Hanneke
Su excelencia Gobernador Alfonso Boekhoudt ta un hende homber cu un postura elegante natural, su escogencia den e mundo sartorial ta uno clasico den su funcion. Clasico y elegante!
E distinguida esposa di gobernador di Aruba, Hanneke Boekhoudt, a luci den un shimis floral combina cu su sombre y jacket ros. Su asesorionan den tononan cla a combina cu e shimis. Aki nos por mira un ehempel cu no ta tur ora e pareha mester combina colornan p’asina e conhunto keda bon.
