Parti di e funcion di Angelo Domacassé na Oficina di Turismo na Boneiro ta, cu tur aña e ta presenta e ideanan nobo y innovativo pa por organisa y implementa como actividad of evento. Evaluando su conocemento personal y profesional, el a presenta e idea pa organisa un ‘certamen’ pa scoge un embahadora pa representa Bonaire y Oficina di Turismo den exterior y durante e eventonan local. Pues asina e idea di Miss Tourism Bonaire a surgi, pa crea un embahadora local pa promove Boneiro den exterior.
E criteria pa participa na e certamen ta cu e hoben mester tin afinidad of conocemento di turismo. E mester por demostra cu e tin pasion pa promove su isla y tambe ‘commitment’ pa dedica tempo y ta dispuesto pa fungi como embahadora di Bonaire. E evento no ta un certamen pa e ganadora bay competi den e certamennan Internacional, pero pa promociona Bonaire y traha den diferente proyecto local y international.
E certamen a crece segun e añanan, E biaha aki lo bay bira di 3 aña cu lo bay organisa e certamen di Miss Tourism Bonaire. Nan a cuminsa cu e certamen na aña 2018, pero e certamen cu mester a tuma luga na 2020 no por a cristalisa pa motibo di e protocol y restriccion cu e pandemia a trece cu ne. Momento cu a mira cu e pandemia a stabilisa na Bonaire, nan a cuminsa cu tur actividad y plania pa e certamen tuma luga 13 di maart 2021. Esey a resulta net e siman cu Bonaire a encontra su mes cu un di dos crisis di e casonan di covid a subi drasticamente.
Rayshantaly Coffie: Miss Tourism Bonaire 2019
Actualmente e certamen ta plania pa tuma lugar dia 29 di mei 2021y te na e momento aki e certamen lo ta exclusivamente virtual, p’asina nan adkeri na e protocol y restriccion di covid. Lo tin grupo di baile hunto cu e participantenan, cu lo duna un show pa e apertura. E candidatanan lo bay tin 3 presentacion oficial den trahe uniforma. E prome presentacion ta nan discurso di Turismo, e di dos presentacion ta trahe di baño y e final ta den trahe di gala, y aki nan lo bay ricibi un pregunta relaciona cu turismo. Segun Angelo ta bisa cu e certamen Miss Tourism Bonaire tin un crecemento den preparacion y dedicacion tanto di e candidatanan como e organisacion riba un nivel caminda nan kier yega.
