E tabata e icono di e decadanan di 1950 y 1960: e strea di cine frances Brigitte Bardot. Ademas di su habilidadnan pa actuacion, e tabata tambe modelo y cantante mas cu 60 aña pasa. Bardot ta cumpli 87 aña dia 28 di september y el a tuma refugio den su cas campestre, La Madrague na St Tropez, Francia. E luga caminda Brigitte a pasa e ultimo añanan, a ser diseña segun su deseonan, unda e ta biba cu su casa, Bernard d’Ormale.
Despues di un bida di filmacion hopi hectic, Brigitte a bay biba na e cas cu ta directamente riba awa, pero e ta aisla di e mundo exterior pa muraya halto, heki y palonan di mata grandi. Den e luga aki Bardot ta haya su paz y privacidad, algo cu e ex-actriz ta haya hopi importante. Desde Bay of Canoubiers e cas no ta visibel y no sin rason. “Mi tabata malo y cansa”, el a yega di bisa un biaha den un entrevista cu Vanity Fair. “Ta un bon cos cu mi a renuncia, pasobra asina mi por a termina mescos cu Marilyn Monroe y Romy Schneider”.
Aunke e actriz den e decada di 1950 tabatin un carera exitoso como strea di cine, e mes no semper tabata positivo riba e periodo ey di su bida. El a retira den e momento cu e tabata gosa di mas fama na 1973. El a bira lomba pa e mundo di cine y finalmente, manera e mes ta bisa, su bida real a cuminsa. “Henter mi bida, prome y despues di ‘And God Created Woman’ nunca tabata loke mi tabata kier. Brigitte Bardot cu su look di ‘pin-up girl’ a haci impacto internacionalmente. El a bisa cu e no tabata escandaloso en absoluto y tabata djis kier ta su mes.
