E tabata un sentimento hopi dushi y di orguyo pa Yelitza Domacassé-Helmeyer cu despues di hopi aña por a logra inicia den un localidad propio. Cu su soño a bira realidad despues di tur e sacrificio y trabou duro durante 15 aña. Helmeyer Dental Clinic a wordo funda na october 2008 y nan a cuminsa traha oficialmente dia 1 di februari 2009 na Dadelstraat. E desicion pa Yelitza no tabata uno facil debi cu nan a custuma eynan. E tabata nan unico ‘cas’ pa 15 aña y cual e ta keda semper agradecido di por a traha den e edificio eynan y cu awor nan ta na Avenida Milio Croes.
Ora e oportunidad a bati na porta pa bay den un localidad propio, esaki a ser gara cu dos man aunke cu sentimento mixto, pero cu e focus pa sigui bay dilanti. Tempo cu Yelitza a cuminsa traha tabata cada un pashent cu a yega cerca nan y haci ‘mond op mond reclame’ cu a yuda nan bira conoci den comunidad. Esaki tambe ta door cu Yelitza a biba 10 aña den exterior y e tempo ey social media no tabata asina popular. For di inicio di Helmeyer Dental Clinic semper nan a lucha incansablemente pa bay dilanti y brinda e miho servicio na nan pashentnan.
Yelitza Domacassé-Helmeyer ta sigui pasiona cu e carera cu el a scoge pa e simpel hecho, cu ta algo cu desde chikito e tabata kier a haci. E ta haci su trabou como dentista cu hopi amor, pasion y dedicacion. E ta lanta tur dia y bay cu placer trabou. Un trabou cu a pon’e conoce hopi hende y hopi caracter. Cu no ta tur ora por complace tur hende, pero ta sigui kere den su mes y su habilidad como profesional. E ta un soño cu a bira realidad door di traha duro pa locual cu e kier yega na dje, siguiendo dilanti semper cu Fe y positivismo.
Den Focus Digital Magazine di augustus por lesa e interesante entrevista cu Yelitza Domacassé-Helmeyer hunto cu su dos asistentenan; Jasmine Croes-Maduro – Assistent y Praktijk Coordinator, cu tin15 Aña trahando na Helmeyer Dental Clinic. Joan Dania – Assistent y Administratie Medewerker, cu ayera 4 di augustus a cumpli 10 Aña na Helmeyer Dental Clinic. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
