Geraldine Coutinho-Meyers, Associate Director of Sales & Events na Hyatt Regency Aruba Resort Spa & Casino ta sinti su mes honra pa ricibi Industry Leader Award 2024 di Smart Women in Meetings na Las Vegas, Nevada. E reconocemento aki no ta solamente un logro personal sino un testimonio di e avancenan increibel di e hende muhenan den meetings and events industry.
E trayectoria di Geraldine den e industria di MICE a cuminsa na aña 1990, unda cu a hunga un rol fundamental den lansamento di Hyatt Regency na Aruba. Su dedicacion y pasion a wordo ilustra durante e prome bishita di un grupo na e hotel. Aki ta caminda cu su planificacion y anticipacion di e necesidad di cliente a resulta den un experiencia inolvidabel. Alabes, ta di menciona cu Geraldine a fungi como Area Director di Norte America pa Aruba Tourism Authority.
Smart Women in Meetings ta reconoce y honra e hende muhenan cu ta e miho den nan ramo y premia esunnan cu a demostra un liderazgo excepcional, innovacion y dedicacion. E premio tambe ta representa e logronan colectivo di tur hende muhe cu a construi e caminda, a kibra barera y redefini loke ta significa pa lidera den e idustria aki.
Den Focus Digital Magazine di e luna aki, Geraldine Coutinho-Meyers ta conta con e tabata testigo durante su carera di e poder transformacional di e liderazgo femenino. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
