Un persona cu no ta para keto den su creatividad – asina ta con Enrita Werleman ta descibi su mes – . E ta sigui hopi artista di mosaic riba e rednan social y durante pandemia, el a tuma cursonan online pa siña diferente tecnica pa traha cu mosaic. Di mosaic Romano y Bizantino te cu Mosaic contemporaneo. Enrita a gradua e aña aki como profesora den arte di mosaic y asina e por instrui su alumnonan miho na Ate Mosa – Atelier Mosaic pa sigui crea y crece. E inicio tabata 12 aña pasa ora Enrita a traha pa su cas algun lampi pa muraya di mosaic.
Di eynan algun amiga a puntr’e si e por siña nan traha cu mosaic. E interes di e hendenan pa e arte di mosaic a crece te cu Enrita a duna e grupo e nomber Ate Mosa. E ta cortico pa Atelier Mosaic y el a incorpora den e logo un cara di hende muhe, e Mosa. Enrita ta conta cu el a lanta den un cas hopi creativo, unda su wela tabata borda slopi y clech’i cama, y su mama tabata haak paña di mesa y tabata cose tur nan shimisnan. Semper Enrita tabatin shimis nobo pa scol cu telenan bunita di Adolf Groder na San Nicolas.
Na inicio di su estudio na Hulanda, el a cumpra un machin di cose y a siña su mes haak, brei y cose. El a sigui tambe diferente curso pa traha carchi, klei, pinta, etc. Cu e talento desde jong di Enrita pa obranan di man por mira awendia con el a desaroya den un experto den arte di mosaic. Su pasion pa arte a haci cu Ate Mosa – Atelier Mosaic a crece enorme den creatividad durante añanan. Den Focus Digital Magazine di october, Enrita Werleman ta conta mas tocante su arte di mosaic. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
