Despues di a completa su estudio di Bachelor of Science in Hospitality Management na Florida International University, Charlène a bolbe su dushi Aruba, cla pa start su carera den sector hotelero. El a haya e oportunidad pa bira Assistant Executive Housekeeper cu 23 aña y el a sigui crece den su carera como Manager den e area di Rooms Division. Na 2001, un oportunidad nobo a bati na su porta. El a wordo puntra si e kier a bira e Training & Employee Relations Manager y el a contesta: “Sigur cu si”. E decision aki a cambia e bida di Charlène Nectar completamente.
U-SparkPeople Management & Development Consultancy
Mirando bek na aña 2025, Charlène ta keto bay den Human Resources Management, pero aworaki cu su mesun compania, un Certified Strategic HR Leader, un Results Coach y un Key Note Speaker. E ta stima loke e ta haci. E ta un gran placer pa Charlène pa por yuda otronan yega nan meta. Un di e consehonan cu semper e ta comparti den su workshop of conferencia ta e importancia di conoce bo mes. Esaki ta encera kico bo punto fuertenan ta, pero tambe esunnan menos fuerte. Pa ta honesto cu bo mes. No tin hende perfecto. E pregunta ta, kico bo ta bay haci pa ta un miho version di bo mes.
Segun Charlène cu ni cuanto experiencia nos tin, semper tin algo nobo pa siña. Keda habri pa perspectiva diferente di esun di bo. No kiermen cu bo mester ta di acuerdo cu tur cos, pero ta mustra cu bo ta dispuesto pa scucha. E capacidad di considera opinionnan diferente di esun di bo, sin perde ken abo ta, ta loke por yuda bo sigui crece como persona. Un di e desafionan mas grandi cu Charlène a topa na cuminsamento di su carera tabata pa wordo tuma na serio como un hende muhe jong, determina y ambicioso.
Durante su carera el a experiencia cu ora bo ta un hende muhe cu ta expresa su mes den un manera directo, cu ta determina y cu ta comparti libremente con ambicioso e ta, cu esaki no tur ora ta wordo bon tuma door di otronan. Charlène Nectar ta den Focus Digital Magazine di e luna aki y por lesa mas tocante su carera exitoso cu sigur ta un ehempel pa hopi hende muhe. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
Download bo revista awo!
