Cumpliendo cu e deseo di Johnny Habibe (dfm) pa celebra cada aniversario di e radio emisora, su yiu muhenan a reuni dia 15 di februari e personanan cu ta parti di HIT 94 pa un brindis na ocasion di su 32 Aniversario. Un anochi unda a reina un bunita ambiente recordando e legendario den radiodifusion na Aruba.
E yiu mayor, Zefráh Davina Habibe, a duna un discurso recordando como un teenager e emocionnan tempo su tata a cuminsa cu su radio emisora. “Mi tata ta den feliz memoria y mi kier recorda su legacia, pasion, dedicacion y lucha. Su amor pa su profesion, famia y pa e comunidad di Aruba”.
Su yiu muhe a bisa cu pa su tata tabata esencial pa a traves di e radio emisora por eleva su pueblo y pa e hendenan ta conscientisa y informa. Cu su tata ta un persona hopi intelectual, cariñoso, firme y cu un bunita curason. “Esey ta mi tata”… tabata e palabranan expresa yen di emocion recordando Johnny Habibe.
E celebracion di 32 aniversario di HIT 94 ta den Focus Digital Magazine di e luna aki, cu ta accesibel via Apple Store, Android Google Play Store y www.focus.aw (Menu Tab FOCUS DIGITAL)
Download bo revista awo!
