Dalia Interior Decor and Design Studio ta enfoca pa ofrece algo mas cu decoracion. Nan ta diseña espacionan funcional, personalisa y cu caracter. E obhetivo di e pareha creativo forma pa Dalia y Rayson Semeleer ta pa haci cada soño realidad. Cu nan experiencia y conocemento ta creando espacionan comodo y bunita, reflehando e personalidad y estilo di bida di cada cliente. Semper nan a kere den e importancia di crea ambientenan cu ta transmiti bienestar. Dalia cu su vision den diseño di interior y Rayson con su experiencia den carpinteria. P’esey e idea a nace pa inicia nan negoshi ora a sinti cu nan por a uni forsa.
Nan a conoce otro na Aruba na aña 2014 a traves di Facebook. Desde inicio tabatin un gran conexion y ora nan a cuminsa biba hunto, a descubri cu nan ta comparti pasion pa diseño. Dalia a decora nan apartamento y Rayson a traha e mueblenan di madera recicla. Eynan ta unda a ripara nan habilidadnan cu ta complementa y combina perfectamente. Esaki ta locual cu no solamente a fortalece nan relacion sino tambe nan pasion pa diseño. Cu e demanda grandi pa un bon diseño di interior, specialmente na e propiedadnan vacacional ta locual a motiva nan pa dal e prome paso y converti nan pasion den un negoshi.
Inspiracion pa haci cada espacio of pieza unico ta surgi for di hopi luga! E naturaleza di Aruba, e cultura Caribeño y principalmente e historianan di nan clientenan. Dalia Interior Decor and Design Studio ta encanta conoce e estilo di bida y preferencia pa crea espacio cu ta representa nan clientenan. Ademas semper ta explora tendencianan nobo, material y tecnica pa mantene nan diseñonan fresco y moderno.
Dalia y Rayson Semeleer ta den Focus Digital Magazine di e luna di april, cu ta accesibel via Apple Store, Android Google Play Store y www.focus.aw (Menu Tab FOCUS DIGITAL)
Download bo revista awo!
