A.T.A. A DESTACA CU PRESENCIA EXITOSO DURANTE SEATRADE CRUISE GLOBAL 2025

Aruba Tourism Authority (A.T.A.) orguyosamente a participa na Seatrade Cruise Global 2025, e evento principal di e industria di crucero mundial cu e aña aki a celebra su di 40 aniversario. Anualmente, Seatrade Cruise Global ta tuma lugar na Miami, caminda ta reuni miles di profesional y ehecutivo di tur parti di mundo. Un bes mas, Seatrade Cruise Global a demostra su balor como un plataforma importante pa Aruba continua na fortalece relacion, intercambia conocemento, y pa comparti e oferta unico cu e isla tin pa ofrece.

E aña aki, Aruba a participa cu un booth vibrante hunto cu nos islanan ruman Curaçao y Boneiro, cual ta reforsa e importancia di colaboracion regional. Ta di menciona cu lineanan crucero ta sigui demostra interes pa combina e tres islanan den nan itinerario, debi na e nivel halto y consistente den satisfaccion y huespednan cu ta keda bishita e isla, tanto riba tera como riba laman.

A.T.A. hunto cu socio strategico di Aruba Ports Authority (APA), a asisti na reunionan den cooperacion di cerca. Reflehando e relacion fuerte y continuo entre e dos organisacionan aki. E union aki ta fortalece e posicion general di Aruba y ta garantisa un mensahe coherente na socionan den industria crucero.

A conta cu varios operador di tour local cu tambe tabata presente di entre otro, De Palm Tours, Fofoti Tours & Transfers, Pelican Adventures, y Kukoo Kunuku cu a conta cu reunionnan fructifero cu ehecutivonan di crucero, habriendo porta pa oportunidadnan pa futuro y expone e creatividad y calidad cu e sector turistico di Aruba tin pa ofrece.

Banda di e reunionnan, e delegacion di Aruba a tuma parti den sesionnan importante manera e General Industry Update, cu a duna bista esencial riba e situacion actual y di futuro di e industria crucero. Un tema constante durante Seatrade tabata sostenibilidad, un area cu ta alinea perfectamente cu e direccion cu Aruba ta tuma. Parti di esaki ta inclui materialnan promocional y regalonan cu ta completamente sostenibel, un escogencia cu ta refleha e balornan ambiental di nos isla. Cu e rekisitonan binidero pa certificacion di GSTC (Global Sustainable Tourism Council), hopi socio local ya caba a tuma paso proactivo pa un operacion mas sostenibel, un esfuerso cu ta ricibi sosten di A.T.A. Mirando cu durante aña ta ofrece diferente oportunidad di entrenamento pa socionan local, cu ta inclui un programa dedica specificamente na sostenibilidad y desaroyo di actividad sostenibel pa huespednan di crucero.

Un momento sobresaliente tabata e reunionnan cu lineanan di crucero di luho, cu a inclui e prestigioso Four Seasons Yachts cu pronto lo inclui Aruba den su itinerario. Four Seasons Yachts ta conoci pa redefini luho riba awa, ofreciendo un experiencia ultra-exclusivo cu biahe bou di guia, diseño perfecto, y cu un servicio mundial. E inclusion di Aruba ta reafirma e apelacion di nos isla pa e mercado di huesped di nivel halto y ta comproba dedicacion na excelencia.

Banda di Seatrade Cruise Global, Aruba Tourism Authority (A.T.A.) ta activamente envolvi den otro evento importante den industria di crucero durante aña. Eventonan cu ta inclui PAMAC Cruise Summit, PAMAC Destination Summit, y FCCA Conference, CLIA Cruise360, Seatrade Europe, y Seatrade Med. Tur ta eventonan cu lo reenforsa Aruba pa continua na fortalece relacion, y keda na altura di tendencia y innovacion global. Tur ta eventonan cu ta ofrece un oportunidad valioso pa conecta cu ehecutivonan di crucero, elabora riba planificacion di itinerario, y pone Aruba riba mapa como un destinacion cu no por falta den e ruta di ningun crucero.

Ta di menciona cu Aruba orguyosamente ta e anfitrion di evento PAMAC Destination Summit den luna di juni 2025. A probecha di e momento durante Seatrade Cruise Global pa tene reunionnan di planificacion importante pa cu evento di PAMAC, cu alabes ta conta cu un perfil halto di miembronan di Florida-Caribbean Cruise Association (FCCA). PAMAC (Platinum Associate Membership Advisory Council) ta spera pa hiba mas cu 150 ehetutivo di crucero y miembro platinum di Florida-Caribbean Cruise Association (FCCA) na nos isla. E evento lo ofrece un oportunidad sin igual pa pone tur e puntonan fuerte di Aruba riba mapa, desde e waf moderno, actividad di nivel superior, te na nos hospitalidad caluroso y nos compromiso cu sostenibilidad.

E booth di islanan ABC na Seatrade Cruise Global 2025 tabata hopi bon bishita, atraendo diferente socio importante, ehecutivo di crucero, capitan, y media internacional. E aliansa entre Aruba, Boneiro y Curaçao ta mas importante cu nunca, y e presencia colectivo ta manda un mensahe clave di union.