E pelicula cortico ‘Sunny’, na e idioma Papiamento, dirigi pa Germán Gruber Jr., a wordo selecciona pa e festival renombra ‘Tribeca Film Festival’ na New York. E pelicula, cu a haci su estreno mundial den e ‘Curaçao International Film Festival’ (CIFF), lo tin su premier internacional dia 5 di juni 2025, den e seccion ‘Short Narrative’, cu tapijt cora y momento cu prensa planifica.
‘Sunny’ ta conta un historia tocante di e paso di hubentud pa adulto, tocante un hoben guitarista cu tin cu laga su bida na Corsou pa sigui su soño musical. E pelicula ta inspira riba experencianan personal di Gruber mes, cu ta logra representa temanan universal manera despedida, cambio y nostalgia di un manera intimo. “Ta pida di mi mes y di hende rond di mi,” segun Gruber. “E ta tocante e transicion for di mucha pa adulto, y e realisacion dushi y marga cu nada lo keda mescos pa semper.”
Gruber a reacciona cu emocion riba e seleccion: “Ta un gran honor cu ‘Sunny’ a wordo selecciona pa un di e festivalnan mas prestigioso na mundo. Tribeca ta ricibi varios mil aplicacion, y e hecho cu nos pelicula cortico, produci na Corsou, ta den e seleccion, ta yena nos cu orguyo. Ademas, ta prome biaha cu lo mustra un pelicula di Corsou na Tribeca. Mi ta spera ku ‘Sunny’ por mustra un publico nobo con fuerte y universal nos historianan por ta.”
E rolnan principal ta interpreta pa Thayzhean Aniseto y Sharlianne Beaumont, dos talento hoben di Corsou. E pelicula a wordo skirbi, dirigi y (co-produci) pa Germán Gruber Jr., den colaboracion cu Ewoud Bon (cinematografia y produccion), Sabine Veendendaal y Jeroen Beker (produccion). ‘Sunny’ ta produci door di ‘Flinck Film’ y ‘Provider Films’, cu sosten financiero di ‘Nederlands Filmfonds’, ‘Cultuurfonds Caribisch Gebied’ y ‘Curaçao Tourist Board’.
Mundo di pelicula na Papiamento ta sigui desaroya
Cu e seleccion di ‘Sunny’, industria di pelicula na Papiamento ta sigui pone su marca den escenario internacional. Gruber, cu anteriormente a traha ‘The Legend of Buchi Fil’ y ‘Sensei Redenshon’, tin fe firme den e atraccion internacional di historianan cu ta bin for di e cultura unico di nos islanan. “Nos no mester sconde ni cambia nos identidad,” Gruber a bisa. “Exactamente ora cu nos ta conta nos mes historia, nos ta toca hende rond mundo.” – ‘Sunny’ ta un di e proyectonan selecciona pa programa ‘Filmfonds Short’ 2024, cu ta enfoca riba sostene talento nobo den mundo di pelicula.
Mas informacion tocante Tribeca Film Festival riba https://tribecafilm.com
