E tabata e beyesa cu tabatin e honor di carga e sjerp cu e nomber di ARUBA na Miss Universe 2020 na Florida, USA. Despues di e certamen Helen Hernandez a dicidi di muda bay biba na Merca, aunke nunca el a pensa con dificil tabata pa laga su isla hunto cu su famia atras. Awendia e tin un bida cu e no por keha y ta bendiciona cu un yiu homber cu a nace 19 december 2024. Helen ta disfrutando cada momento como mama di Benjamin Valentino Barroso. E ta probablemente e reto di mas grandi cu el a experimenta den su bida y tambe esun di mas bunita.
Helen a conoce su pareha, Brandon Mathhew Barroso, tres aña y mey pasa na Merca. El a nace na New Jersey y su mayornan ta forma pa un pareha Portoriqueño y Cubano. Helen y Brandon tabata feliz cu e noticia cu tin un baby na caminda. E tabata net e momento cu Helen a haya un bon trabou y Brandon su compania tambe a cuminsa crece, pues nan tabata cla pa forma un famia. Actualmente e ta purba di ta presente den cada un di su rolnan. Ora e ta cu su yiu e ta 100% mama, ora e ta afo di cas e ta purba di concentra den locual mester wordo haci.
Un di su cosnan preferi di ta mama ta wak su yiu experimenta y descubri cada dia algo nobo y esey ta yena Helen su curason di alegria. Den Focus Digital Magazine di mei, Helen ta comparti mas detaye di su bida awor como mama y su plannan pa futuro. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
Download bo revista awo!
