E noticia cu tin un baby na caminda tabata un sorpresa grandi pa Rocalia y Joshua Wagner. Ora menos a spera, Dios a bendiciona nan cu e miho regalo di mundo. Di biaha e futuro mayornan a bay Kapel di Alto Vista pa gradici Dios pa Su regalo y alabes resa pa E guia y proteha nan durante henter e embaraso. E fecha cu D’Zaylan Kenobi Wagner a nace tabata 17 di september 2024. Rocalia ta corda ainda ora dokter a hisa su baby pa mustr’e y esaki tabata surreal. E tabata feliz y alabes procesando cu ta su baby y awor e tin un mucha, un ser humano pa hiba cas pa cuida y stima.
Rocalia a experencia un embaraso cu a bay hopi bon y resultadonan tambe semper tabata bon. E tabatin e dicha di nunca a pasa malo, sinembargo despues di su embaraso e tabata un etapa un poco mas dificil. El a experencia un curpa diferente di kico e tabata custumbra cu ne prome cu el a sali na estado. El a keda cu Strech marks, dark spots, mommy pouch y extra peso. Esakinan sigur tabata traha riba su autoestima. Pero e parti mas importante tabata pa el a siña stima y balora su curpa pa e bunita creacion cu el a trece na mundo.
Un di e cosnan preferi pa Rocalia di ta mama cu e tin e bendicion di por mira D’Zaylan crece, bay riba aventuranan y gosa di tur su prome biahanan. Celebrando e aña aki “Dia di Mama” pa prome biaha ta hopi special y su deseo ta pa crea un laso fuerte cu su yiu. D’Zaylan mester por sa cu su mami y papi semper t’ey pa yud’e y gui’e. Rocalia durante su añanan trahando como maestra a nota e importancia y influencia positivo cu un mayor tin den bida di un mucha.
Rocalia ta hunto cu Joshua y nan baby D’Zaylan den Focus Digital Magazine di mei, unda por lesa e entrevista completo y admira e bunita potretnan. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
Download bo revista awo!
