Un alegria cu un sentimento mixto a resalta durante e celebracion di 30 Aniversario di MEGA 88 FM memey di e personanan cu ta forma e famia radial di e emisora. E tabata e deseo di e fundado, Johnny Habibe awe den feliz memoria, pa celebra e tres decada di e radio cu un bunita fiesta.
Cumpliendo cu e deseo di su kerido tata, Davina Habibe como yiu muhe mayor, a dirigi algun palabra gradiciendo tur persona cu a bin comparti un ocasion asina special. Cu un curason yen di emocion el a expresa, cu e celebracion aki tabata un deseo di su tata for di aña pasa pa celebra MEGA 88 FM su 30 Aniversario.
E ta un satisfaccion di a cumpli e deseo di su tata pa organisa hunto cu Julissa Anthony cu tin mas cu 25 aña den e team, pa prepara e celebracion cu hopi amor y gradicimento pa e coleganan di MEGA 88 FM. E lagrimanan di emocion tabata parti di e anochi aki, unda e personanan cu tabata asina cercano na Johnny Habibe no por a evita di bira emocional.
Davina a relata con su tata tabata cont’e di e coleganan di e emisora resaltando nan amor y dedicacion na e programacion. Asina el a yega na formacion di e personal asina dedica cu na tur momento ta apoya e famia di e radio emisora. Su tata tabata un persona cu semper a apoya e talentonan nobo, cu el a sa di guia exitosamente den e media aki.
E programacion di MEGA 88 FM ta resalta pa comparti e palabra di Dios como cu Johnny Habibe tabata conoci pa ta un persona creyente di hopi fe. P’esey entre e diferente personanan cu a conta nan bunita experiencia cu e fundado den feliz memoria, cu locual tabata di sumo importancia p’e tabata pa e palabra di Dios yega na e comunidad di Aruba.
Entre e bunita recuerdonan, emocion y alegria a celebra MEGA 88 FM su tres decada dedica na ofrece un programacion positivo y inspirativo. E invitadonan a disfruta di un delicioso buffet y variedad di bebida, cu e bolo dushi pa hunto a canta pa e celebracion di 30 Aniversario. E parti musical tabata na encargo di Los Mostros del Swing, cu a anima e anochi den nan estilo unico cu hopi ritmo y ambiente.
