Dos di e integrantenan di e grupo “Los Mostros del Swing”, Gregorio y Omerwui, desde adolescencia tabata encanta musica, specificamente cantamento na nan pais di origen. Na Aruba ambos a cuminsa train cantica te momento cu nan a sinti cla pa deleita cu nan karaoke na fiesta di amigonan. Riba un dia nan a wordo acerca pa Ángel Hernàndez, cu tin su trayectoria musical, pa scucha tanto nan cantamento como nan propuesta. Ambos a cay den bon tera y el a bisa nan: “Muchachones preparense para que salgamos al ruedo, yo los voy apoyar y a seguir preparando”. Pues asina nan a inicia den e mundo di entretenimento na Aruba.
E nomber hopi peculiar di e grupo a nace den un “echadera de broma” manera nan ta expresa na Spaño. Omerwui cu ta un di e integrantenan tabata yama cualkier persona cu e tabatin band’i dje “mostro” bisando nan loke sea. Un dia prome di inicia cu e prome show: Ángel, Gregorio y Omerwui, a puntra otro: “Ajá, y que como nos vamos a llamar” y nan a pensa: “Los Mostros del Swing”. Nan a inicia nan prome presentacion cu e cancion “La Dueña del Swing” di Los Hermanos Rosario. Y asina nan a keda yama e grupo!
E prome presentacion tabata na un cas pa celebra Dia di Tata, unda un amigo di nan – DJ Jansen – a bisa cu e grupo por bin toca. Desde e prome te cu awor pa e integrantenan tur fiesta tabata bon, paso e hendenan ta baila y disfruta. Semper den cada presentacion nan ta logra capta un cliente cu ta pidi nan pa anima tambe nan celebracion. Den Focus Digital Magazine di juni “Los Mostros del Swing” su integrantenan ta comparti mas di e popular grupo aki cu ta hopi gusta pa nan presentacionnan vibrante y yen di ritmo. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
