E misa unda Charlotte Sophie Eloise Arends a ricibi Curpa di Cristo pa prome biaha tin un significacion hopi special pa e famia. Na Pro-Cathedral San Francisco e mama di Charlotte a ricibi su Prome Santa Comunion y a uni den matrimonio cu su tata. Despues Jennifer y Ricky Arends a batisa nan yiu muher na mesun e misa aki. Charlotte tabata contento celebrando un momento grandi den su bida y di su famia. Specialmente su wela cu ta juffrouw di scol, cu a prepara hopi mucha di derde klas pa ricibi y awor a toca turno na su unico nieta.
Charlotte a sigui lunanan di lesnan intensivo di preparacion pa e dia di su Prome Santa Comunion. Na cas tambe e famia a prepara Charlotte hopi bon pa e por comprende e paso aki y kico ta nifica pa e tin fe y Hesus den su bida. E sentimento tabata uno hopi alegre hunto cu tur e muchanan cu tabata bay misa tur diadomingo pa preparacion. Charlotte mes ta bay un scol priva pero a haya e oportunidad pa ricibi hunto cu Sint Dominicus College, un scol cu su wela a traha hopi aña eynan.
Un di e momentonan bunita cu a trece hopi emocion como famia ta ora Charlotte a hiba flor pa Mama Maria durante su comunion. Charlotte su mama, Jennifer, tambe tabatin e mesun tarea dia di su Prome Santa Comunion. Un dato special ta cu Charlotte a confesa cu Monseigneur Secco, kende a casa su mayornan. E diasabra 17 di mei riba dia cu Charlotte a ricibi su Prome Santa Comunion tabata uno hopi bon coordina, cu a bay sumamente bunita, yena di emocion y alegria.
Charlotte a keda precioso den su shimis blanco clasico pa mucha di Spaña. Di joya tradicional el a bisti su armband cu e tin for di baby cu segun cu e ta creciendo a laga ahusta na su man. E celebracion di e Prome Santa Comunion di Charlotte Sophie Eloise Arends tabata cu un brindis familiar despues di misa caminda a brinda y desea Charlotte hopi bendicion den su bida. E ocasion memorabel aki a haya un espacio special den Focus Digital Magazine di juni.
