Aruba Airport Authority N.V. (AAA) ta masha orguyoso pa anuncia cu nan a ricibi nan prome AHATA Impact Award den e categoria di ‘Inversion Social’, como reconocemento pa e esfuersonan sobresaliente di responsabilidad social corporativo pa cu e comunidad local. AAA tambe a haya mencion honorabel den e categoria ‘Conservacion di Medio Ambiente’.
Diabierna 27 di juni 2025, a invita AAA pa e di 3 AHATA Impact Awards cu a celebra e companianan cu ta haciendo un diferencia duradero na Aruba pa medio di iniciativanan impactante. A nomina AAA den tres categoria:
- Conservacion di Medio Ambiente
- Inversion social
- Bienestar di empleado
E categoria di ‘Inversion Social’ ta destaca e programanan cu ta atende e necesidadnan critico di comunidad manera pobresa, educacion, cuido di hende grandi y mas, sea pa medio di tempo boluntario of sea ta via sosten financiero.
E team di proyecto di asistencia social di AAA “Wings of Hope (WoH)” a cuminsa den e unidad di siguridad di AAA y tabata e base pa inicia cu un programa basa riba proyecto na escala mas grandi adopta pa henter e compania cu e unico proposito di yuda y sostene e famianan den necesidad, WoH den colaboracion cu Directie Sociale Zaken (DSZ) ta trahando diligentemente pa 5 aña caba y a contribui na un averahe di 50 pa 60 famia anualmente cu un inversion mas o menos di 148.500,00 florin pa aña. Durante henter e añanan te cu aña 2024, WoH a ehecuta cu exito un total di 31 proyecto socialmente responsabel pa e comunidad local, cu un contribucion promedio total di 270.000,00 florin pa aña.
Pa aña 2025, AAA ya a planea y lansa ocho proyecto nobo, alinea cu e Metanan di Desaroyo Sostenibel di Nacionnan Uni (UN SDG), specificamente:
- Cero hamber (2)
- Bon salud y bienestar (3)
- Educacion di calidad (4)
- Igualdad di genero (5)
- Energia pagabel y limpi (7)
- Desigualdadnan reduci (10)
- Ciudadnan y comunidadnan sostenibel (11)
- Paz, husticia y institucionnan fuerte (16)
- y Asociacionnan (17)
Adicionalmente, Wings of Hope ta conta cu un portal di donacion, cu ta permiti e organisacionnan/ fundacionnan registra pa entrega un plan di proyecto basa riba e “AAA’s Donation Policy” y esunnan di SDG di Nacionnan Uni.
“Wings of Hope” tabata instrumental pa e moral di e compania den e prome lunanan di e pandemia di Covid y te dia di awe e ta sigui ta un fuente di orguyo pa e empleadonan di AAA segun cu nos ta sigui amplia e alcance y e impacto positivo di e proyectonan di WoH. Duna bek y contribui na un manera positivo y duradero na e comunidad cu nos ta sirbi a bira parti di e DNA di AAA y mi no por ta mas orguyoso di e team di Wings of Hope y henter AAA pa esaki,” asina Angeline Flemming, Director di Health and Sustainability, a expresa.
Tocante Aeropuerto di Aruba
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na mas cu 3.2 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 77% ta di Merca y Canada, 15% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
 ta masha orguyoso pa anuncia cu nan a ricibi nan prome AHATA Impact Award den e categoria di ‘Inversion Social’){kind=link}