E tema pa edicion di Focus Digital Magazine di juli ta resalta e temporada di vakantie. Riba e portada ta ilustra Joana Alvarez cu p’e no ta importa cua parti mundo el a bishita, importante ta cu cada experiencia ta converti den un gran historia pa conta. Biaha ta inspira Joana Alvarez profundamente y ta expande su horizontenan a atraves di e experiencianan siñando otro cultura- y perspectivanan, descubriendo facetanan nobo den su bida. E exploracion di diferente luga y interaccion cu personanan nobo ta genera un profundo impacto den su creatividad, comprension di mundo y desaroyo personal.
Joana no tin un number magico ni un meta estableci di cuanto pais e lo desea di conoce, paso e lo encanta di descubri mas tanto cu ta posibel. Cada luga tin algo unico y magico pa ofrece, cada salida, cada aventura y cada paso pafo di su zona di confort ta dibuha liñanan nobo riba e mapa personal cu cada persona ta hiba paden. E no ta focus riba e cantidad sino den e calidad di e experiencianan cu e falta pa biba y descubri. E kier probecha y disfruta cada oportunidad cu e tin pa siña, crece y disfruta di e proceso di descubrimento y enseñanza cu cada pais tin pa ofrece.
Joana ta identifica cu varios tipo di biahero, esun aventurero, cultural y di relahacion. Locual e ta haya importante ta cu ken e ta comparti e experiencianan aki. E ta kere cu e manera cu nos ta explora mundo ta refleha ken nos ta y loke nos ta busca. Joana Alvarez ta comparti hopi tips manera cua aplicacion ta e miho ora di biaha y di e metodo 5-4-3-2-1 pa haci e maleta pa ta mas efectivo y funcional. Focus Digital Magazine ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
