Gradua cu e titulo di Bachelor Magna Cum Laude tabata un sentimento increibel pa Jelsyvette Kaylyn Croes, cu ta conoci como Jelsy. Su estudio den Exercise Science cu direccion den Pre-Occupational Therapy na Palm Beach Atlantic University na West Palm Beach – Florida, ta encera un logro grandi. Un logro cu e no ta considera unicamente riba su puntonan, pero un refleho di e pasion cu e tin pa e carera. E ta un premio pa tur e trabou duro y sacrificio, specialmente di su mayornan. Logra e titulo aki ta pa Jelsy un manera di duna nan danki, no solamente pa confia den dje, pero pa dun’e oportunidad pa sigui su estudio y soño.
Jelsyvette a nace den un famia di deportista y for di chikito el a sinti cu e kier ta parti di e mundo di deporte. El a tene su prome raquet di tennis na edad di shete aña y el a namora di e deporte mesora. Jelsy a cuminsa train cinco dia pa siman tur atardi y asina e cancha a bira su segundo cas. Coach Eddy Ras den feliz memoria, ta e persona cu a pone e base pa su trayectoria den tennis. Semper el a kere den Jelsy te hasta ora e mes tabata duda. Su influencia tabata un motibo grandi pakico el a sigui hunga tennis.
Na edad di 11 aña, Jelsy a representa Aruba pa prome biaha den exterior. Coach Johnny Goitia a bira un persona clave den su desaroyo, cu a gui’e den varios torneo, yudand’e crece mental- y tecnicamente. Despues Coach Claudio Martínez a yud’e inculca disciplina, caracter y responsabilidad, calidadnan cu a yuda Jelsy logra su soño na 2021 hungando tennis na College. Dia 12 di april 2025, el a hunga su ultimo wega na College, un momento unda el a realisa cu tur e tempo di dedicacion y sacrificio a bale la pena.
Den Focus Digital Magazine di juli, Jelsyvette Croes ta splica tocante escogencia di su estudio y su deseonan pa futuro. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
