Na un crusada di su bida cu tur cos stabil, Cristina Tromp a bisa: “Kico awor?”. Esey tabata na februari 2020 unda despues di a pensa hopi, el a realisa cu loke mas e gusta ta guia, educa y yuda hende. Cu e pensamento aki den mente el a inicia cu Balor Balor Consultancy & Consultancy. Kisas hopi hende no sa cu Cristina mes a pasa den problema financiero durante un temporada di su bida. Pues e trayecto di Cristina Tromp cu Balor a cuminsa como un logro personal bunita. Cu su erornan e lo haci algo positivo pa yuda e hendenan crece den nan finanza.
Su soño tabata di inicia na e islanan ABC, unda tur hende lo corda su storia y pa nan no comete su erornan. Cu nan por reconoce e bandera cora y scoge pa nan mes. El a conoce hopi hende cu a siña kico ta maneha negoshi y pa sigui kere den nan mes. E ta un gusto ora e topa bek su clientenan of nan contact e pa comparti nan logro. Te hasta ora nan no a logra ainda nan meta. Su satisfaccion ta cu nan sa, cu den bon of den malo e t’ey pa nan.
Den e parti di negoshi, el a siña cu tur hende ta wak nan cartera. Y no tur hende kier duna balor na bo conocemento, crecemento of tempo, cual ta bin cu un prijs. Pero abo tin cu duna balor na bo mes sin tin miedo, pasobra ora un porta cera, otro ta habri. Na final di dia e ta priminti si un persona tin un bon prestacion y conscientisa, ta gana so e tin di gana.
Cristina ta kere firmemente cu bo NO por ta exitoso den bo finanza sin skirbi bo presupuesto y bo plannan. Cristina Tromp ta formando parti di e team di Focus y ta comparti su conocemento den su seccion “Money Cronicles”. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
