Focus Digital Magazine di juli ta resalta e temporada di vakantie y Ian Flanegien ta comparti su biahe pa Hapon cual a ser inspira for di chikito. Ian tabata gusta wak shownan na Hapones y el a siña lesa hopi lihe door di tur e subtitulonan. Despues el a sigui siña hopi mas di e lenguahe Hapones y tambe traha diferente cuminda Asiatico. Cu tur e encanto cu e tabatin pa Hapon, el a dicidi cu e mester bishita e pais. Su escogencia di biahe e aña aki pa pasa su vakantie tabatin como destino Hapon. Ian a cumpli su deseo y conoce e luganan mas emblematico y purba tur locual ta mas autentico. For di hopi pisca curo pa raindrop cakes, el a purba delaster un cuminda cu bo no ta haya asina facil na Aruba.
Ian su prome experencia ora el a yega Hapon tabata uno hopi tenso. El a confronta cu un situacion dificil door cu e no por a uza ni su credit card ni tampoco su debit card. E mester a tuma trein pa bay na Asakusa, Tokyo y tabatin $28 so den su cartera. Ian a logra converti su placa den Japanese Yen y el a cumpra ticket di trein. Despues el a subi trein robes y yega den un area completamente contrario di unda e mester a bay. El a logra yega bek airport y a pidi un hende local pa ayudo. E tabata asina amabel cu el a subi trein y compaña Ian te na su destinacion. Esey a cambia ful Ian su experiencia di stress pa un experiencia agradabel.
Como e tipo di biahero cu ta integra su mes den e pais, tur caminda cu Ian bay e kier experiencia e pais den e perspectiva di un persona cu ta biba eynan. Ora e ta por ehempel na Merca e ta come na restaurantnan cu e localnan ta come, na Hapon e kier bishita luga cu localnan so sa di dje. E ta sinti cu esaki ta enrikese su experiencia hopi y ta lag’e experiencia algo unico cu hopi hende no ta wak. E gusta explora diferente tipo di café of patisserie! E tiendanan cu ta bende obranan di arte di e localnan y tambe e naturalesa di e pais. Specialmente si tin hopi canamento, paso e ta sinti e ora cu e ta bale la pena.
Biaha y wak mundo ta inspira Ian masha hopi mes! Tin asina hopi diferente cultura, arte, cuminda y hende cu ta existi, cu e por siña hopi cos di nan y constantemente desaroya su mes. Ian ta conta hopi anectoda den Focus Digital Magazine di juli y di e trayecto largo pa yega su destinacion. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
