E ultimo añanan tin hopi estudio haci tocante amor, pareha y estilo cu bo tin pa relaciona bo mes cu un otro persona. Hopi informacion a wordo adkiri y ta basa riba trabou di antropologo Helen Fisher y treci dilanti pa autor Roxie Nafousi. Tin hopi teoria, pero esun cu e sicologo, Sabrina Sonensein, ta haya mas interesante ta ”e teoria di TRES AMOR” y cu el a comparti den Focus Digital Magazine su edicion di juli. E teoria aki ta conta cu den nos bida, nos lo namora tres biaha, na tres etapa diferente di nos bida. Cada amor ta sinti totalmente unico di e otro y ta siña nos algo diferente cu ta forma e persona cu nos ta birando.
E tres tipo di amornan ta; E Prome Amor, E Amor Intenso, y E Amor Incondicional. E Prome Amor ta sinti manera un cuenta di hada ‘sprookje’. E ta e amor di mucha cu ta absorbe bo completamente y uno cu na e momento ey, bo ta pensa cu lo dura pa semper. Hopi biaha nos ta experencia nos prome amor na scol secundario y usualmente e ta caba, pasobra e dos personanan sea ta crece for di otro of pa motibo di un argumento trivial, cu e relacion simplemente no ta suficientemente fuerte pa soporta.
E amor aki usualmente ta mas superficial, cu mas importancia poni riba con e relacion por parce pa otro. Aunke e ta sinti sigur manera amor berdadero na e momento ey, e no ta usualmente e amor profundo y cu lo bo experencia mas despues. E dolor di curason por sinti inmenso inicialmente, pero bo ta recupera di dje rapidamente. Sabrina Sonensein ta elabora tambe riba locual e otro tipo di amornan y tambe di 13 les cu nos por saca afor di e teoria aki. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
