REXA BIZOU CU PROYECTONAN PA HACI UN DIFERENCIA DEN UN PERSONA SU ALMA

E workshops di Rexa Bizou a cuminsa den un manera hopi special y tabata un gran diferencia pa Rekha Croes-Daryanani. Di sali for di online scondi tras su screen y post su trabounan pa habri un store. Na comienso e tabata dificil pa e mes bay mas publicamente. Y awor habri e espacio pa para dilanti otro y siña nan traha acesorio. Desde inicio di Rexa Bizou e meta no tabata solamente pa traha acesorio, pero pa traha piesanan cu ta significativo. Esey Rekha a haci den diferente forma door di personalisa, traha piesanan cu tin nificacion y trece un mensahe positivo,

E meta ey ta loke ta guia Rekha pa sigui tanto cu e piesanan como awor cu e eventonan cu ta touch e curason di e hendenan. E workshops a cuminsa pa Dia di Hende Muhe door cu Rekha tabata kier a haci algo special. Esaki no solamente a traves di traha algo na man, pero tambe pa duna un palabra di curashi y mima e persona, cu ora nan sali ta sinti great y refresca. El a yama Jenny cu ta su amiga di hopi aña, ken alabes ta un life coach y asina nan a haci e prome workshop. Esaki tabata no solamente pa esunnan cu a participa, pero p’e mes tambe.

E prome tayer aki a cende un chispa den Rekha y haciendo un diferencia den su propio bida. E tabata sa cu loke el a sinti e prome biaha, sigur e kier pa e otro hendenan tambe por sinti. Desde e prome workshop, e participantenan a pidi pa ripiti. Rekha a sigui inverti den esaki, cambia mesa, drecha store pa asina acomoda tur hende mas confortabel. Nan ta haya hopi workshop priva, team buildings pa compania y maske cu e shedule ta yena, e ta purba haci maske ta 1 biaha un workshop general. E ultimo di e maestronan y tambe di teens tabata esnan hopi special cu pa Rekha ta un logro grandi.