Siña tocante nos dushi isla por ta un aventura pa nos muchanan. Famia, amigo y amiga por conecta cu nos cultura, historia y naturalesa di Aruba, mientras ta pasa tempo hunto dibertiendo cu otro.
Esaki ta exactamente kico e di tres edicion di BanSerio! su Scavenger Hunt a propone como meta e aña aki: un momento unico pa nos muchanan den dushi compania di mayor of famia. Mayla a pasa asina leuk aña pasa cu e aña aki su amigo Ricky tambe ta uni cu ne pa participa.
Durante e vakantie aki, fuera di Mayla y Ricky, ya 26 grupo a participa riba e aventura rond nos bunita Aruba. Diseña pa nos muchanan siña, pero tambe pa nos adultonan por yuda nos muchanan desaroya mas conocemento di nos cultura, historia, arte y mas. E Scavenger Hunt ta un actividad gratuito cu ta trece e gruponan hunto pa explora, descubri y busca tesoro rond. Na fin di dia, nos ta siña hopi mas di nos isla, reconecta cu nos Aruba y pasa tempo di calidad cu otro.
E aña aki e Scavenger Hunt ta mas grandi cu nunca: 16 sitio, 21 pregunta, 2 pregunta bonus y mas premio ainda pa gana! Dicon mas grandi?
Mayla y Ricky a pidi BanSerio! pa crea un experiencia cu ta entretene, siña y inspira. E preguntanan ta diseña pa uza diferente habilidad pa resolve reto, manera uzo di medio digital, traha hunto, habilidad di combersa y descifra informacion. A prepara tur tarea cu dedicacion y amor pa pone atencion riba nos comunidad: cultura (popular) di Aruba, nos flora y fauna, nos historia y e organisacionnan cu ta pilar den nos comunidad. Tur esaki pa nos refleha riba nos privilegio di ta biba riba Aruba.
Ta agradecido di a ricibi hopi mensahe di e amigonan di Mayla y Ricky, locual cu tabata mahestral pa lesa ta cu grandi y chikito a siña sumamente hopi durante e Scavenger Hunt. Algun grupo a menciona cu despues di e recorido aki nan conoce mas sitio na Aruba y otro grupo a resalta cu nan a haya diferente informacion nobo, asina nan a enrikece nan conocemento mas di tema di nos dushi pais.
