MARISOL SANCHEZ MALDONADO: “E ESENCIA DI E MENSAHE MESTER POR KEDA RESONA”

Na juni e aña aki, Marisol Sanchez Maldonado a ricibi na New York e reconocemento internacional “PRNEWS Top Women in PR Class of 2025″, cu ta significa algo hopi bunita p’e. Agradecido di por a ricibi e reconocemento aki, no solamente pa su mes, pero tambe pa su coleganan y pa Aruba Tourism Authority como organisacion. Durante e evento, entre representantenan di comunicacion di marcanan grandi y reconoci rond mundo, e sentimento di por a scucha e nomber di Aruba a yen’e cu hopi emocion. E premio aki ta destaca Marisol su liderazgo y impacto excepcional riba tereno di comunicacion.

Despues di a termina VWO na Colegio Arubano na aña 2007, Marisol Sanchez Maldonado a studia International Tourism Management na Facultad di Hospitalidad y Turismo na Universidad di Aruba. Na aña 2015 el a gradua pa su Master’s Degree den International Management na Universidad di Tilburg na Hulanda. Na aña 2011 el a ricibi e “Shoco Award” como “Student of the Year” y na aña 2021, dies aña despues, el a ricibi “AHATA  Excellence Awards Honoree” trahando e tempo ey pa Amsterdam Manor Beach Resort.

Marisol a cuminsa su carera na A.T.A. na februari 2022 como un specialista di PR y comunicacion corporativo y a promov’e pa su rol di liderazgo actual como Gerente di Comunicacion na mei 2023. Actualmente e ta dirigi e ekipo di comunicacion ‘PR’ global y ta hunga un rol clave den forma e strategia di comunicacion di A.T.A. Desde e momento cu Marisol a cuminsa cu su estudio te cu awor, e tabatin oportunidad di experencia diferente tipo di lider den e industria di turismo, tanto hende muhe como hende homber. E experiencianan aki hunto cu balornan cu ta importante p’e a forma e estilo di liderazgo cu e tin; enfocando riba inteligencia emocional y empatia creando conexion cu miembronan di ekipo.

Den un industria manera turismo, nos ta depende grandemente di e capital humano y no tin miho forma pa cultiva conexion cu un persona cu pa lag’e sinti cu bo ta mir’e di berdad. Den Focus Digital Magazine di e luna aki, Marisol Sanchez Maldonado ta splica con e ta balansa atraccion global cu autenticidad local y crea mensahenan cu ta resona entre culturanan sin perde su esencia. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)