Turismo ta mas cu un industria, e ta un brug cu ta conecta hende, cultura y oportunidadnan. Como Minister di Turismo, Transporte y Labor, mi ta honra di por uni e comunidad mundial den celebra Dia Mundial di Turismo, un momento pa refleha riba e poder di turismo pa transforma bida y fortalece nacionnan.
E tema di e aña aki “Sustainable Transformation” y e slogan “Where Knowledge Sparks Impact”, ta capta e esencia di loke turismo mester representa awendia. E palabranan aki ta corda nos cu dato, investigacion y conocemento local no mester keda unicamente den ideanan riba papel pero mester ta transforma den accionnan midibel cu ta fortalece nos comunidadnan, proteha nos medio ambiente y enrikece e experiencia di e bishitante. Tambe nan ta refleha e vision cu nos tin pa Aruba: un futuro unda conocemento ta guia crecemento sostenibel y unda progreso ta comparti pa un y tur.
Aruba su historia ta profundamente mara cu turismo. For di e prome pioneronan cu a kere den e potencial di nos isla, te na e generacionnan di trahado y e empresarionan cu a forma nos cultura di hospitalidad, turismo a bira e batimento di curason di nos economia. E ta sostene miles di famia, ta inspira innovacion y ta permiti nos pa comparti e bunitesa y calor di nos isla cu mundo.
Pero segun cu nos ta mira nos dilanti, e yamada pa transformacion sostenibel ta bira mas urgente ainda. Biahamento mundial ta evolucionando, impulsa pa e expectativanan di bishitante cu ta cambia, innovacion digital y e realidadnan di clima. Pa Aruba, esaki ta nifica fortalece nos conectividad aereo y maritimo, garantisando cu e biaheronan por yega na nos facilmente mientras ta disfruta di un experiencia flexibel y memorabel for di momento cu nan “touch down”. Nos aeropuertonan, aerolineanan y partnernan crucero ta aliadonan vital den e trayecto aki y hunto, nos lo sigui posiciona Aruba como un lider den accesibilidad y calidad.
Turismo, sinembargo, no ta solamente tocante yegada y salida, e ta tocante hende. Tras di cada bonbini caluroso tin un trahado Rubiano dedica, un profesional capacita y un comunidad cu ta brasa e bishitantenan cu orguyo. Ta p’esey labor ta keda un parti central di e combersacion di turismo. Nos forsa laboral no solamente merece oportunidadnan pero tambe e entrenamento, proteccion y empoderacion necesario pa prospera den un sector cu ta cambiando rapidamente. Door di inverti den nos hendenan, nos por ta sigur cu conocemento ta lanta impacto na tur nivel di servicio y innovacion.
Na mes momento, sostenibilidad mester ta e compas di tur loke nos ta haci. Como un isla chikito, nos ta bendiciona cu beyesa natural pero tambe encarga cu e deber pa proteh’e. Nos playanan, rifnan y cada paisahe ta tesoronan cu mester ta salvaguardia pa medio di strategianan responsabel, practicanan consciente di negoshi, y compromiso fuerte cu comunidad. “Transformacion Sostenibel” ta nifica sigura cu crecemento di turismo ta bay man den man cu planificacion ambiental, preservacion cultural y inclusion social.
Riba Dia Mundial di Turismo, mi ta invita nos tur; gobierno, comerciante y cada ciudadano pa refleha riba e rol cu nos tin den forma e futuro di turismo. Laga nos celebra nos logronan mientras nos ta brasa e retonan nos dilanti cu curashi, creatividad y colaboracion. Hunto, nos por sigura cu Aruba no solamente ta yama mundo bonbini pero tambe ta lidera como un ehempel den demostra kico turismo responsabel, inclusivo y sostenibel berdaderamente ta nifica!
mr. Wendrick Cicilia
Minister di Turismo
