Un carera artistico di 30 aña ta sigur un momento cu ta pone Rodrick – Rocco – Franken reflexiona riba su experiencianan durante tur e añanan tras di lomba. E ta agradecido sigur pero ta record’e tambe riba tur e cosnan cu e kier logra ainda. Un di su deseonan ta pa colabora cu mas artista local y internacional. Pa explora y wak te na unda e por yega tanto cu e bandanan cu e ta canta aden, pero tambe como solista y orador pa inspira. Rocco ta simplemente purba di ta un miho persona y artista cu ayera. Cla pa siña algo tur dia.
Durante Rocco su trayecto di tres decada como cantante, e cambio mas drastico a tuma luga cu su bos for di hoben pa adulto. El a stop cu cantamento durante un temporada pa asina por a duna su stem e chens pa desaroya. Y na grandi ainda e ta purba di implementa tecnica nobo den su canto pa sea cuida of mehora su presentacionnan. Den su estilo e lo bisa: “Mi semper a keda mesun cos. Mi ta purba di conta un storia cu mi bos hincando mi maximo esfuerso pa transmiti locual e cantica ta pidi e momento ey”.
Rocco no por defini su mes como un artista den un solo genero, pero ta flexibel den diferente genero. Di por forma parti di un banda ritmo combina y otro bandanan moderno. Si e mester menciona cua ta un reto grandi cu el a enfrenta lo ta e fanatismo cu ta bin cu e farandula di ta forma parti di un of diferente banda. Bo ta haya fanaticonan di otro banda musical cu no ta gusta bo djis pasobra bo ta den un otro banda cu no ta nan banda faborito.
Riba e pregunta na Rocco si el a yega di sinti presion pa adapta na tendencianan of a keda fiel na su estilo, e ta contesta: “Sigur esaki ta algo cu mi ta kere hopi artista ta pasa aden, pasobra tendencianan musical ta cambia cu tempo cu bo kier of no. Pero ami ta kere cu si algo ta bon haci e no tin un “expiration date”. Contestando e pregunta, si mi a yega di sinti e presion ey pa cambia. Pero cu tempo mi a siña di balora mi autenticidad y keda fiel na mi estilo unico.”
Den Focus Digital Magazine di october por lesa mas di Rodrick – Rocco – Franken, unda e ta conta mas di su carera artistico di tres decada y ta revela kico lo ta su siguiente paso. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
