E momento faborito di Amelia Rosemary Elskamp den concurso di beyesa tabata dia cu el a haci su proyecto pa Miss Youth 2023. Su proyecto a hiba lagrima, esfuerso y hopi anochi sin descanso. Den e momento ey, e no tabata preocupa pa gana e miho proyecto, sino wak algo cu el a crea cu ta representa den tur aspecto loke e ta para p’e. Amelia nunca antes a papia cu asina tanto pasion pa algo y te awe esaki ta yen’e di hopi orguyo. Amelia ta studiante di Colegio Arubano y actualmente ta den examen jaar. Prome cu el a cuminsa tres aña pasa cu modelahe, su unico hobby tabata pinta, cual a haci’e un persona hopi atento pa detaye.
Aunke como un reina di beyeza, Amelia ta carga un gran responsabilidad, e ta purba di tin e balans entre scol, bida personal y responsabilidadnan como miss. E ta bisa cu hopi biaha bo lo mester scoge entre ta un reina y bo bida personal. Esaki por ta dificil na comienso, pero el a compronde cu prome cu un reina, e ta un hoben cu hopi meta cu no ta inclui solamente un corona. Su educacion semper lo ta prome y asina e lo structura su bida personal y su tareanan como reina di beyeza rond di esaki. Educacion p’e ta un privilegio y dunando esey e importancia cu e merece ta nutri su bida personal y tambe ta demostra un bon ehempel como reina di beyeza.
Su participacion den Miss Youth Aruba y Miss Teen Mundial a yud’e surpasa e miedo cu e tabatin di expresa su mes.Hopi biaha e tabata stop di haci algo of bisa loke e ta pensa. Casi semper otro hende ta dicidi p’e door di e miedo pa tuma un decision y pa haci un fout. Ainda ora nan lo scoge algo cu Amelia no gusta, e lo baha su cabes y keda keto. El a drenta varios actividad pa hoben, pero niun tabata yud’e sali for di su insiguridad. Te ora cu tres aña un persona a wak potencial den dje y el a introduci’e den e mundo di beyeza. Na comienso e tabata scucha e palabranan manera: “E ta bunita pero e ta mucho timido” of “E tin potencial pero e no tin actitud di reina”.
Un conseho cu Amelia a ricibi den un di su prome training tabata: “Semper ora bo ta riba stage bo mester smile, no ta importa si bo haci un fout, bo pega ora di papia of slip cay, pero nunca bo ta kita bo smile“. Un conseho simpel y logico, el a ripara cu tur tabata parce otro na final. Amelia a compronde cu no tabata trata di e smile solamente, pero esey ta representa e siguridad cu e mester tin y kere den su mes. Amelia ta bisa: “Confiansa no ta algo cu bo ta djis nace cu ne, e ta algo cu cada un di nos por yega na dje, e no tabata facil, pero e ta posibel. El a tuma mi un certamen di beyeza pa compronde esey, e tabata e certamen di Miss Youth Aruba 2023, unda mi a logra e titulo maximo. Awor mi ta pensa riba e mucha muhe timido ey cu mi tabata y mi ta hari di pensa cuanto cos mi tin e curashi di haci awendia”.
Con bo ta prepara mentalmente pa Miss Teen Americas 2025?
Mi a yega di participa caba den un certamen internacional y enfrenta varios obstaculo, pero esun di mas grandi tabata e cansancio. Mayoria dia mi lo tin maximo 2 ora pa por drumi entre yega e hotel marduga y lanta 4’or. Tin biaha den bus na caminda pa e actividadnan mi ta purba descansa. Ainda den e situacion ey semper mi tabata percura pa mantene mi postura como reina, esey ta loke ta wordo spera di bo como miss. Mi tabatin 16 aña y prome biaha leu di mi famia. Entre e presion di duna mi maximo y e cansancio mi tabata perde mi mes den cierto momento. E experiencia aki a siña mi con importante e ta pa prepara mentalmente.
Ki strategia bo a uza pa mehora?
Mi a siña haci uzo di journaling cual ta yuda mi pone mi emocionnan y mente na ordo. El a yuda mi hopi cu public speaking, paso e ta bira mas facil pa por expresa un idea of un opinion. E ta mantene mi mes consciente di loke bo ta pensa riba varios aspecto.
Con bo ta prepara fisicamente?
Fisicamente mi ta prepara cu hopi esfuerso. E parti mas dificil tabata e training cual na comienso ora bo tin motivacion ta facil pa lanta y haci bo rutina, pero despues di par dia ora bo curpa tin dolor, e motivacion ta bay laga bo. Solamente bo disciplina ta mantene bo riba pia. Door cu semper mi a gusta di tin un diet saludabel, e parti ey tabata mas facil y loke a yuda mi hopi na momento di mantene mi figura. Bo fisico den un certamen ta importante, e ta representa bo disciplina y con bo ta priorisa bo salud
Con e progama na El Salvador ta durante e siman di e certamen?
Nos tin varios actividad pa nos conoce e cultura y diferente paisahe na El Salvador. E certamen lo tin un duracion di 7 dia. E prome dianan nos lo ta na un hotel pa despues bay na un isla. E dianan importante lo ta e dia di presenta na e forum di Miss Teen Americas, e fashion show y e gala final unda e certamen lo conclui.
E wardrobe y trahe nacional cu bo ta hiba ta diseña localmente?
Mi trahe nacional ta inspira riba e storia di e Tunnel of Love of Huliba Cave, cual ta un diseño local cu lo representa un bunita parti di nos cultura. Aunke no tur mi wardrobe ta diseña localmente, cada outfit ta pensa pa por representa e esencia alegre di nos isla.
Si bo corona Miss Teen Americas 2025, cua lo ta bo mensahe?
Como hoben mi por reconoce cu nos ta biba den un generacion unda cu hopi balor a wordo perdi. Nos ta biba den un generacion unda cyberbullying ta normal manera un trend y unda abuso di substancia ta wordo glorifica. Un generacion cu educacion no ta un prioridad, unda mayoria ta purba busca un manera mas facil di crea stabilidad. Nos ta biba den un generacion egoista y individualista, cu no ta worry cu e efecto di nan decisionnan. Mahatma Ghandi, un gran personahe den historia, a yega di bisa: “Papia solamente si esey ta mehora e silencio”. Cu e plataforma di Miss Teen Americas mi lo sigura mi mes di papia y logra mehora e silencio cu ta existi rond di nos hobennan. Mi no lo cambia tur hoben cu palabra, pero si mi lo logra crea un chispa di consenshi riba e actualidad. Mi lo percura pa cada accion cu mi tuma y palabra mi bisa ta refleha den mi actonan.
Amelia Elskamp tin un ‘raffle contest’ cu dinner vouchers como premio pa yud’e cu su ultimo tokenan pa representa Aruba na Miss Teen Americas 2025.
