Un hende muhe perseverante, misericordioso y alegre, cu a crece na Sao Paolo, Brasil y el yega Aruba pa prome biaha na 1988. E beyesa, paz y e pueblo di Aruba a conkista e curason di Claudia Daher. Awendia mas cu djis un esposa dedica y mama di tres yiu cu logronan academico, e ta un empresario, filantropo, pintor pasiona, wela cariñoso y un director visionario di e negoshinan di famia. Aventurando den e reino literario, Claudia a crea “R.A.T.S – Revolutionary Army of Teens” un novela di ciencia ficcion cu ta dirigi riba e hubentud, profundisando den topiconan manera e impactonan social di inteligencia artificial, cambio climatologico, bida extraterrestre y mescla di culturanan global.
R.A.T.S ta un storia fascinante cu ta tuma luga na Aruba, cu ta sigui e bida di un mucha homber hoben cu yama David. Na su ciudad natal, e efectonan di cambio di clima a bira mas evidente, formando e bida di e hendenan rond di dje. Den e contexto aki, David ta descubri un wega di video iresistibel yama Rats – Revolutionary Army of Teens – inventa pa su welo, HB. Sin cu David sa, e wega ta contene un secreto remarcabel cu no solamente ta conecta su famia na un aventura extraterrestre extraordinario, pero tambe ta atende cu e asunto urgente di cambio climatologico. E storia ta conecta e complehidad di e dinamica familiar, explorando e relacion entre mayornan y welonan for di diferente cultura y religion.
E prome simia di e buki R.A.T.S. tabatana 2012 tempo cu tabatin hopi charla tocante fin di mundo y Claudia a cuminsa wak e sociedad mas profundamente. El a observa famia den restaurant sin papia — tur hende riba nan celular. E hobennan tabata parce mas aleha, emocionalmente aisla y desconecta cu e balornan familiar. Mientras e media tabata yena di maldad, violencia y inmoralidad. Claudia a puntra su mes: ”No tin nada miho cu nos por ofrece na e generacion aki?”. E ora ey, el a dicidi pa skirbi algo puro, significativo y cu ta inspira, sin odio ni scuridad.
E tono di e buki ta emocional, cu ta inspira y yen di aventura, amor, accion y misterio. E ta pa tur edad — sin palabranan mahos of contenido ofensivo. E mensahe ta cla: sin importa nos color, rasa of religion, nos tur tin un hende cu ta stima nos. E ta e esencia di “We Are One”. Den Focus Digital Magazine di october, Claudia Daher ta conta con e idea di “R.A.T.S – Revolutionary Army of Teens” a evoluciona for di concepto pa manuscrito. Locual e ta spera como autor, cu e lectornan ta hiba despues di a cera e ultimo pagina. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
